Ռոբերտ Քոչարյանին չեզոքացրեցին, քանի որ առջևում Տիգրանաշենի ու Սահմանադրության հարցերը կան․ Աննա Գրիգորյան
ՔԱՂԱՔԱԿԱՆՈՒԹՅՈՒՆ
Ռոբերտ Քոչարյանին չեզոքացրեցին, քանի որ առջևում Տիգրանաշենի ու Սահմանադրության հարցերը կան: Այս մասին մամլո ասուլիսի ժամանակ ասել է «Հայաստան» խմբակցության ղեկավար Աննա Գրիգոյանը:
«Այսօր նախագահ Քոչարյանի ծննդյան տարեդարձն է, արդեն երկրորդ անգամ նախագահ Քոչարյանը գտնվում է անազատության մեջ, ուղղակի ուզում եմ շնորհավորել նրան ծննդյան տարեդարձի կապակցությամբ, և քանի որ ինքը չի սիրում երկար և ճոխ տեքստեր, մաղթանքի տեսքով ուղղակի ուզում եմ քաջ առողջություն մաղթել պարոն նախագահին։ Իրականում այս գործը քաղաքական և աշխարհաքաղաքական է, որի մասին ավելի հանգամանալից կխոսենք, բայց որպես արձանագրում ուզում եմ ասել հետևյալը՝ Արցախի չորս նախագահներից 3-ը այս պահին գտնվում են Բաքվի բանտում, իսկ նախագահ Քոչարյանը գտնվում է Երևանի ԱԱԾ մեկուսարանում:
Սրանք պատահական բաներ չեն, սա նշանակում է, որ այնտեղ, որտեղ չեն հասնում Ալիևի ձեռքերը, օգնության է գալիս Նիկոլ Փաշինյանը։ Հարց է առաջանում, հատկապես հետընտրական փուլում, երբ արդեն ձևավորված իշխանություն կա, ի՞նչ կարիք կա կալանքի տանել նախագահ Քոչարյանին: Ակնհայտ է, որ առաջիկայում սպասվում են լրջագույն փորձություններ Հայաստանի Հանրապետության և մեր ժողովրդի համար՝ մասնավորապես Տիգրանաշենի հանձնման ադրբեջանական պահանջները, որը Նիկոլ Փաշինյանի թեթև ձեռքով մեկ օրում դարձավ Քյարքի, և պարզվեց, որ այն այլևս Հայաստանի Հանրապետության տարածքային ամբողջականության մաս չէ, չնայած դրա համար որևէ իրավական հիմք չկա:
Հետևաբար պետք էր չեզոքացնել քաղաքական ընդդիմադիր դաշտում հիմնական դերակատարներից մեկին՝ նախագահ Քոչարյանին, Նիկոլ Փաշինյանը փորձում է Հայաստանի Հանրապետությունը տանել ամբողջությամբ թուրքական ենթակայության տակ, և դրա համար պետք է նաև թշնամական հարաբերություններ հաստատել Ռուսաստանի հետ, ինչի նախանշանները մենք ամբողջությամբ տեսնում ենք, պետք է չեզոքացվեն մարդիկ, ովքեր ռացիոնալ միտք են հնչեցնում և ասում են, որ Ռուսաստանի հետ թշնամական հարաբերությունները Հայաստանի Հանրապետությանը որևէ բան չեն տալիս»,- նշել է Գրիգորյանը:
