Որքա՞ն է լինելու ձեր կենսաթոշակը․ այժմ կարող եք ինքնուրույն հաշվարկել
ՀԱՍԱՐԱԿՈՒԹՅՈՒՆ
Այս նպատակով անհրաժեշտ է մուտք գործել uss.social.gov.am կայք, ապա գլխավոր էջի «Ծառայություններ» բաժնի «Սոցիալական ապահովություն» ենթաբաժնում սեղմել «Կենսաթոշակի հաշվիչ» դաշտի վրա։
Այնուհետև կարող եք ընտրել կենսաթոշակի համապատասխան տեսակը՝
- աշխատանքային,
- զինվորական կամ
- պետական պաշտոն զբաղեցնելու հիմքով
և մուտքագրել պահանջվող տվյալները։
Եթե ընտրել եք աշխատանքային կենսաթոշակը, 1974 թվականի հունվարի 1-ին կամ դրանից հետո ծնված լինելու դեպքում անհրաժեշտ է կատարել նշում, այնուհետև մուտքագրել աշխատանքային ստաժը, իսկ հաշմանդամության խմբի առկայության դեպքում ընտրել նաև խումբը։
Կերակրողին կորցնելու դեպքում անհրաժեշտ է նշել մահացած ծնողի կամ ծնողների վերաբերյալ պահանջվող տվյալները, մուտքագրել ստաժը և սեղմել «Հաշվել» կոճակը։ Համակարգն ինքնաշխատ եղանակով, ըստ մուտքագրված տվյալների, կկատարի նախնական հաշվարկ, և դուք հնարավորություն կունենաք տեղեկանալ ձեր կենսաթոշակի չափի մասին՝ ստանալով մանրամասն տեղեկատվություն կատարված հաշվարկի վերաբերյալ։
Զինվորական կենսաթոշակն ընտրելու դեպքում անհրաժեշտ է մուտքագրել զինվորական ծառայության ստաժը, անձնական գործակիցը, իսկ հաշմանդամության խմբի առկայության դեպքում ընտրել միայն հաշմանդամության խումբը և անձնական գործակիցը։
Կերակրողին կորցնելու կարգավիճակի առկայության դեպքում պետք է ընտրել համապատասխան կարգավիճակներից որևէ մեկը, մուտքագրել պահանջվող տվյալները, ապա սեղմել «Հաշվել» կոճակը։
Եթե ձեզ հետաքրքրում է պետական պաշտոններ զբաղեցրած անձանց կենսաթոշակը, ապա այս դեպքում դուք կարող եք ընտրել համապատասխան պաշտոնների խումբը, այնուհետև՝ զբաղեցրած պաշտոնը։ Պաշտոնների առաջին խումբն ընտրելիս մուտքագրել ստաժի, իսկ երկրորդ խումբն ընտրելիս՝ պաշտոնային դրույքաչափի և հավելավճարի վերաբերյալ տեղեկատվությունը և սեղմել «Հաշվել» կոճակը։ Համակարգն ինքնաշխատ եղանակով կկատարի կենսաթոշակի նախնական հաշվարկը և կներկայացնի մանրամասն տեղեկատվություն։
Օգտվեք կենսաթոշակի հաշվիչից և նախապես իմացեք ձեր կենսաթոշակի հնարավոր չափը։
