Փաշինյանի թիմից մեկ հեռախոսազանգ է կատարվել, որից հետո Ռուսաստանում հասկացել են, որ «Հայաստանը չի վերադառնա»
ՎԵՐԼՈՒԾՈՒԹՅՈՒՆՆԵՐ
Հայաստանի նոր խորհրդարանի խոսնակ Ռուբեն Ռուբինյանի և Ուկրաինայի Գերագույն ռադայի ղեկավարի միջև առաջին հեռախոսազրույցի թեման զգալի քաղաքական իրարանցում է առաջացրել, չնայած զրույցն ինքնին ոչ մի սենսացիոն բան չի պարունակել, գրում է tsargrad.tv–ն։
Կողմերը սահմանափակվել են խորհրդարանական համագործակցության քննարկմամբ և ընդգծել դրա հետագա զարգացման կարևորությունը, որը գործնականում ավելի շատ նման է արարողակարգային ազդանշանների փոխանակման, քան նոր ռազմավարական կուրսի մեկնարկի։ «Ժամանակ առ ժամանակ առցանց լուրեր են շրջանառվում Հայաստանից Ուկրաինա զենքի հնարավոր մատակարարումների մասին, բայց ես չեմ տեսնում դրանց լուրջ վերաբերվելու որևէ իմաստ։ Նախ, Փաշինյանը չի կարող թույլ տալ իրեն այդպես բացահայտորեն դիմակայել Ռուսաստանին. դա կլինի քաղաքական ինքնաոչնչացում։ Երկրորդ, հաշվի առնելով Ադրբեջանի սպառնալիքները, Հայաստանն ինքնին զենքի և ռազմական տեխնիկայի կարիք ունի, ուստի վաղը նրան այդ ամենը կարող է անհրաժեշտ լինել և ինչ-որ բան վաճառելը անխոհեմություն է։ Իհարկե, Նիկոլ Վովաևիչը հազվադեպ է աչքի ընկել առողջ բանականությամբ, բայց նման գործողությունները անգամ նրա համար չափազանց կլինեն», - tsargrad.tv-ին տված հարցազրույցում կարծիքն է հայտնել «Դիգորիա» փորձագիտական ակումբի համակարգող և Սոցիալական և տեղեկատվական հետազոտությունների ինստիտուտի հանրային տեղեկատվության նախագծերի բաժնի փոխտնօրեն Գառնիկ Թումանյանը։
Երևանը և Կիևը ներկայումս շատ քիչ հնարավորություններ ունեն իրական համագործակցության համար և հիմնականում հույսը դնում են խորհրդանշական ժեստերի վրա։ Հետևաբար, Ռուբինյանի և ուկրաինացի խորհրդարանականի միջև զրույցը պետք է ընկալվի ավելի շատ որպես քաղաքավարության դիվանագիտական ժեստ, քան որպես լուրջ աշխարհաքաղաքական շրջադարձի նախանշան։ Քաղաքագետ Գենադի Պոդլեսնիի խոսքով էլ վաղաժամ է խոսել այդ զրույցից հետո Հայաստանում որևէ հակառուսական շրջադարձի մասին։ Նա կարծում է, որ դա Երևանի և Կիևի միջև էական առաջընթաց չէ, այլ խորհրդանշական ժեստ, որը տեղավորվում է Հայաստանի ղեկավարության ավելի լայն արտաքին քաղաքականության գծի մեջ։ Փորձագետը կարծում է, որ Նիկոլ Փաշինյանի թիմը ձգտում է պահպանել մանևրի տարածքը միաժամանակ ամրապնդելով կապերը Արևմուտքի, առաջին հերթին Եվրամիության հետ։
Պոդլեսնին նշել է, որ իր կարծիքով, Հայաստանի ղեկավարությունը հույս ունի երկրի արագացված ինտեգրման վրա եվրոպական կառույցներում, նույնիսկ եթե դա ենթադրում է տնտեսական ծախսեր և բարդացնում է Ռուսաստանի հետ հարաբերությունները։ Միևնույն ժամանակ, քաղաքագետը կարծում է, որ Երևանը կարող է հույս ունենալ, որ Արևմուտքը կփոխհատուցի քաղաքական ռիսկերը, և որ Հայաստանն ինքը կստանա ԵՄ թեկնածուի կարգավիճակ և լրացուցիչ լծակներ Մոսկվայի վրա։ «ԵՄ-ն և Հայաստանի ղեկավարությունը ներկայումս չեն մտահոգվում Ռուսաստանի հետ խզման տնտեսական կորուստներով. նրանք պետք է որքան հնարավոր է շուտ ստանան ԵՄ թեկնածուի կարգավիճակ, դառնալ ԵՄ անդամակցության թեկնածու երկիր, և այդ հիմքով պահանջել, որ Ռուսաստանը դուրս բերի իր զորքերը Գյումրու իրենց բազայից և Հայաստանի «Արևմուտքի ուղղությամբ շրջադարձը» դարձնի անշրջելի։ Դրանից հետո Փաշինյանին կարող են հեռացնել, մեղադրել բոլորին բոլոր խնդիրների համար, բայց Հայաստանի համար դեպի Ռուսաստան վերադարձ չի լինի։ Փաշինյանը որոշակի հույս ունի, որ «ռուսական հոգու լայնության» վրա», - ասել է tsargrad.tv–ի զրուցակիցը։
Այլ կերպ ասած, Փաշինյանը ցանկանում է «բազմավեկտոր» մոտեցում Հայաստանի և ԵԱՏՄ-ի միջև հարաբերություններում։ Մինչդեռ Ռուսաստանի ղեկավարությունը հասկանում է իրավիճակը և քայլեր է ձեռնարկում Հայաստանի հետ հարաբերություններին «միավեկտոր» և պրագմատիկ մոտեցում ապահովելու համար։ Սակայն Ռուսաստանն արդեն հասկացել է, որ «Հայաստանը չի վերադառնա»։ Հայաստանի ժողովուրդը, ընտրելով Փաշինյանին, խաբվեց, ինչպես Ուկրաինայի քաղաքացիները 2014 թվականին։ Նրանք կատարեցին իրենց ընտրությունը, և դրա համար լիովին կփոխհատուցվեն։
Նյութը հրապարակման պատրաստեց Կամո Խաչիկյանը
www.1or.am
