Չարենցավանից տուն էր գալիս․ Ալափարսում վթարի հետևանքով մահացածներից մեկը Արզական գյուղից էր

Նախօրեին Կոտայքի մարզի Ալափարս գյուղի տարածքում ողբերգական ավտովթարի հետևանքով մահացած 2 քաղաքացիներից մեկը Արզական գյուղի բնակիչ Գ․ Հայրապետյանն է: NEWS.am-ի տեղեկություններով նա 79 տարեկան էր, դեպքը տեղի է ունեցել Չարենցավանից դեպի Արզական վերադառնալու ճանապարհին։
«Նա «ՈւԱԶ» ավտոմեքենայի վարորդն է եղել, այդ պահին մենակ է եղել մեքենայում, տուն էր գալիս։ Երկորրդ մահացածն ու վիրավորները մյուս մեքենայում են եղել, բյաց իրենց չենք ճանաչում, մեր գյուղից չեն»,- ասաց մեր զրուցակիցը։

Հիշեցնենք, որ երեկ՝ հուլիսի 19-ին, խոշոր ու ողբերգական ավտովթար էր տեղի ունեցել Կոտայքի մարզում։ Ժամը 19:30-ի սահմաններում Ալափարս գյուղի վարչական տարածքում բախվել էին «ՈւԱԶ» և Hyundai մակնիշի ավտոմեքենաները։ Վթարի հետևանքով 1 հոգի տեղում մահացել էր, 4 հոգի տեղափոխվել էին հիվանդանոց։ Ավելի ուշ հիվանդանոցից ահազանգ էր ստացվել ոստիկանության բաժին, որ վիրավորներից մեկը գիտակցության չգալով մահացել է։ Նշենք, որ վթարի փաստով Չարենցավանի քննչական բաժնում նախաձեռնվել է քրեական վարույթ, պարզվում են ավտոմեքենաների սեփականատերերի, վարորդների, մահացածների և վիրավորների ինքնությունները։