Yeni Safak. Իսրայելը ճիշտ պահին է ճանաչում Հայոց ցեղասպանությունը
ՎԵՐԼՈՒԾՈՒԹՅՈՒՆՆԵՐ
Իսրայելը ճիշտ պահին է ճանաչել Հայոց ցեղասպանությունը, ասվում է «Yeni Safak» լրատվական գործակալության վերլուծական հոդվածում, գրում է eadaily.com–ը։ «Իսրայելի կառավարության կողմից 1915 թվականի Օսմանյան կայսրությունում տեղի ունեցած ողբերգական իրադարձությունները որպես, այսպես կոչված, «Հայոց ցեղասպանություն» ճանաչելը այն ժամանակ, երբ նույնիսկ Հայաստանում աճում են այդ հարցի վերանայման և դրա քաղաքականացումից հրաժարվելու կոչերը, դժվար թե կարելի է պատահականություն անվանել։ Այս քայլը պետք է դիտարկել Բենյամին Նեթանյահուի կառավարության ավելի լայն աշխարհաքաղաքական ռազմավարության համատեքստում», - նշվում է հոդվածում։
Հեղինակը նշում է, որ վերջին ամիսներին Իսրայելում նկատելիորեն մեծացել է մտահոգությունը Դոնալդ Թրամփի վարչակազմի և Թուրքիայի ղեկավարության միջև արագորեն ամրապնդվող հարաբերությունների վերաբերյալ։ Ավելին, ըստ նրա, խոսքը ոչ միայն միջպետական համագործակցության, այլ նաև Թրամփի և Ռեջեփ Թայիփ Էրդողանի միջև անձնական փոխըմբռնման մասին է։ «Ամերիկայի նախագահը Անկարային է ճանաչել որպես Միացյալ Նահանգների հիմնական ռազմական և քաղաքական դաշնակիցներից մեկը ընդգծելով, որ «շատերը չեն գիտակցում, թե որքան ուժեղ է Թուրքիան ռազմական առումով»։ Ռուտտեի հետ համատեղ ելույթի ժամանակ նա թուրքական զինված ուժերը անվանելով «շատ հզոր» համաձայնել է այն գնահատականի հետ, որ թուրքական պաշտպանական արդյունաբերության համալիրը ներառում է համաշխարհային շուկայում գործող ավելի քան երեք հազար ընկերություն։ Ավելին, Թրամփը ուշադրություն է հրավիրել թուրքական ռազմաարդյունաբերական համալիրի խորը ինտեգրման վրա ամերիկյան տեխնոլոգիաների և զենքի հետ և հստակեցրել է, որ Վաշինգտոնը պատրաստ է նոր գլուխ բացել Անկարայի հետ ռազմատեխնիկական համագործակցության մեջ։ Ըստ էության, սա նշանակում է Թուրքիայի ճանաչում ոչ միայն որպես տարածաշրջանային տերություն, այլ նաև որպես անկախ ուժի կենտրոն, որը կարող է որոշել Մերձավոր Արևելքում և Արևելյան Միջերկրական ծովում ռազմական և քաղաքական հավասարակշռությունը», - շարունակվում է հոդվածը։
Հենց այս գործոնն է, ըստ հեղինակի, լուրջ մտահոգություն առաջացնում Թել Ավիվում։ «Վերջին ամիսներին իսրայելական, ինչպես նաև հունական լրատվամիջոցները պարբերաբար քննարկել են թուրքական ռազմաարդյունաբերական համալիրի աճը, իսկ Իսրայելի քաղաքական իստեբլիշմենթի որոշ անդամներ նույնիսկ ենթադրել են երկու պետությունների միջև ապագա ռազմաքաղաքական բախման հնարավորությունը», - նշվում է հոդվածում։
Ի վերջո, շարունակում է հեղինակը, այսօր խնդիրը մեկ դարից ավելի առաջ տեղի ունեցած իրադարձությունների մեկնաբանությունը չէ։ «Գլխավոր ինտրիգը պտտվում է Անկարա-Վաշինգտոն-Թել Ավիվ ռազմավարական եռանկյան ապագայի շուրջ։ Որքան սերտանում են ԱՄՆ-ի և Թուրքիայի միջև հարաբերությունները, այնքան ավելի ակտիվ է Իսրայելը փորձում օգտագործել պատմական, դիվանագիտական և տեղեկատվական լծակները այդ մերձեցումը զսպելու համար։ Հենց այդ տրամաբանությամբ պետք է դիտարկել Թել Ավիվի ներկայիս վերադարձը, այսպես կոչված, «հայոց ցեղասպանության» թեմային. սա ոչ թե պատմության շուրջ վեճ է, այլ Մերձավոր Արևելքի և Արևելյան Միջերկրածովյան տարածաշրջանի նոր ճարտարապետության վրա ազդեցության համար պայքար», - եզրափակվում է հոդվածում։
Նյութը հրապարակման պատրաստեց Կամո Խաչիկյանը
www.1or.am
