Ռուբեն Վարդանյանի կինն ուղերձ է հղել
ՔԱՂԱՔԱԿԱՆՈՒԹՅՈՒՆ
Բաքվում բանտարկված, Արցախի նախկին պետնախարար Ռուբեն Վարդանյանի կինը՝ Վերոնիկա Զոնաբենդը, ուղերձ է հղել։
«2026 թվականի հուլիսի 8
Բաքու մեկնող միջազգային կանանց մարդասիրական պատվիրակության՝ հայ բանտարկյալներին այցելելու նախապատրաստական աշխատանքների շրջանակներում ես հրապարակային նամակներ եմ ուղարկել միջազգային և կառավարական գործակալություններին, որոնց մասնակցությունը կարող է ազդել այցի կազմակերպման և մասնակիցների անվտանգության վրա։
Նախաձեռնության նպատակը մնում է զուտ մարդասիրական՝ հանդիպել Ադրբեջանի Հանրապետության օմբուդսմենի հետ, այցելել Ադրբեջանում պահվող հայ քաղաքացիներին և նրանց ընտանիքներից փոխանցել նամակներ, լուսանկարներ և թույլատրված անձնական իրեր։
Ահա թե ինչու ես կարծում եմ, որ կարևոր է գործել բաց՝ պաշտոնական և դիվանագիտական ուղիներով։
Հատկապես կարևոր է հավանական այցի բոլոր փուլերի կանխատեսելիությունն ու համակարգումը. մուտք Ադրբեջան, բանտարկյալների հետ կապ և անվտանգ վերադարձ տուն։ Կարևոր է, որ մասնակիցներն ու նրանց ընտանիքները հասկանան, որ նախաձեռնությունը պատրաստվում է պաշտոնական ձևաչափով և անհրաժեշտ երաշխիքներով՝ ապահովելու համար, որ ուղևորությունը սպառնալիք չներկայացնի նրանց կյանքին և անվտանգությանը։
Այս կապակցությամբ ես բաց դիմումներ եմ ուղարկել՝
• Ադրբեջանի Հանրապետության մարդու իրավունքների հանձնակատար Սաբինա Ալիեւային (https://freearmenianprisoners.com/wp-content/uploads/2026/07/Commissioner-Aliyeva-4.0-1.pdf) խնդրանքով նպաստել այցի կազմակերպմանը իր գրասենյակի հովանու ներքո և ստեղծել դրա համար անհրաժեշտ պայմանները։
• Կարմիր խաչի միջազգային կոմիտեի նախագահ Միրյանա Սպոլյարիչ-Էգգերին (https://freearmenianprisoners.com/wp-content/uploads/2026/07/President-Spoljaric-Egger-1.pdf) խնդրանքով քննարկել այցի կազմակերպման, խորհրդատվական աջակցության տրամադրման և ԿԽՄԿ-ի մասնակցության հարցերն իր մանդատի շրջանակներում։
• Նիկոլ Փաշինյանին (https://freearmenianprisoners.com/wp-content/uploads/2026/07/Prime-Minister-1.pdf) խնդրելով ՀՀ կառավարությունից համակարգել և գործնական աջակցություն ցուցաբերել այցին։
• Եվրոպական Միության արտաքին գործերի և անվտանգության քաղաքականության հարցերով բարձր ներկայացուցիչ Կայա Կալլասին (https://freearmenianprisoners.com/wp-content/uploads/2026/07/High-Representative-Kallas-short-version-1.pdf)՝ խնդրելով դիվանագիտական ուշադրություն և այցի հնարավոր դյուրացում եվրոպական կառույցներից։
Երկարատև մեկուսացման մեջ հայտնված մարդկանց համար նման նախաձեռնությունը մեծ նշանակություն ունի։ Նրանց վիճակը, կալանքի պայմանները և ընտանիքների հետ շփումը չպետք է անտեսվեն կամ կախված լինեն միայն փակ և անկանոն մեխանիզմներից։
Խոսքը վերաբերում է մարդու հիմնարար իրավունքին՝ իմանալ, թե ինչ է կատարվում սիրելիների հետ, կարողանալ աջակցության խոսքեր փոխանցել ու նրանց ստիպել զգալ, որ իրենք մոռացված չեն։
Վերոնիկա Զոնաբենդ»:
