«Մասնագետը կանխատեսել է Հայաստանի տնտեսության վիճակը ռուսական շուկան կորցնելուց հետո»
ՔԱՂԱՔԱԿԱՆՈՒԹՅՈՒՆ
Ռուսաստան գյուղատնտեսական արտադրանքի և որոշ հայկական ապրանքների արտահանման սահմանափակումների պատճառով Հայաստանի տնտեսության ամբողջական ոլորտներ կարող են կորցնել իրենց դիրքերը, իսկ մի շարք ձեռնարկություններ կարող են սնանկանալ։ Այդ կանխատեսումն է vesti.ru լրատվական գործակալությանը տված հարցազրույցում արել Պլեխանովի անվան ռուսական տնտեսագիտական համալսարանի միջազգային բիզնեսի ամբիոնի դոցենտ Անաստասիա Պրիկլադովան։
Նա նշել է, որ Հայաստանի ամբողջ տնտեսությունը փլուզման վտանգի տակ չէ, վտանգի տակ է միայն գյուղատնտեսական ոլորտը։ «Եթե խոսքը երկարաժամկետ հեռանկարի մասին է, ապա խոսքը միայն կոնկրետ մրգերի և բանջարեղենի մշակության և ձկնաբուծական ձեռնարկությունների մասին չէ։ Կան նաև դրանց հետ կապված ոլորտներ, այն է բեռնափոխադրումները, հումքի, ձկան կերերի և պարարտանյութերի մատակարարները։ Հետևաբար, իհարկե, տնտեսությունը կարող է չփլուզվել գլոբալ մակարդակով, բայց երկարաժամկետ հեռանկարում ամբողջ ոլորտներ կարող են պարզապես կորցնել իրենց դիրքերը, կլինի բիզնեսի սնանկացում, և, հետևաբար, սթրես տնտեսության և ընդհանուր առմամբ սոցիալական ոլորտում», - նշել է փորձագետը։
Պրիկլադովան նաև ասել է, որ Ռուսաստանը մատակարարումների սահմանափակումների պատճառով Հայաստանը կկորցնի ՀՆԱ-ի ավելի քան 2%-ը։ Նրա կարծիքով, վնասը շատ ավելի մեծ կլինի այն պատճառով, որ սահմանափակումները մտցվել են համապատասխան ապրանքների սեզոնի գագաթնակետին, այլ ոչ թե ձմռանը։
Փորձագետը նաև կասկածներ է հայտնել, որ Հայաստանը կկարողանա իր ուշադրությունը կենտրոնացնել ՏՏ ոլորտի զարգացման վրա և դառնալ տեխնոլոգիական հզորություն։ Պրիկլադովան կարծում է, որ նույնիսկ Արևմուտքի աջակցությունը չի լուծի խնդիրները։ «Հնարավոր էլ, որ նման դիրքորոշում է խթանվում Հայաստանում, բայց հասկանալի է, որ քիչ հավանական է, որ գյուղացին սկսի աշխատել ՏՏ կամ մեքենագործիքների մշակման ոլորտներում։ Այլ կերպ ասած, քիչ հավանական է, որ գյուղացին դառնա ինժեներ։ Գործազրկությունը կդառնա խնդիր։ Իհարկե, ներդրումներ կարող են լինել, և հնարավոր է, որ լինեն։ Եթե Հայաստանը կողմնորոշվի դեպի արևմտյան շուկաներ, ապա արևմտյան ներդրումներ կլինեն, բայց, միևնույն է, դա խնդիրները չի լուծի», - նշել է Պրիկլադովան։
Նյութը հրապարակման պատրաստեց Կամո Խաչիկյանը
www.1or.am
