Դասական բլեֆ. ի՞նչ ընտրություն է կատարելու Ռուսաստանը. «Փաստ»

«Փաստ» օրաթերթը գրում է.

bloknot.ru–ն իր «Հայաստանը կփակի Շիրակի ռուսական ռազմաբազան և այնտեղ կտեղակայի ամերիկացիներին» վերնագրով հոդվածում գրում է, որ Հայաստանը ակտիվորեն շարժվում է դեպի Եվրամիություն, իսկ Ռուսաստանը պատասխանում է կոշտ միջոցներով: «Ռոսսելխոզնադզորը» սահմանափակել է հայկական ձկնամթերքի և ծաղիկների, կոնյակի և «Ջերմուկ» հանքային ջրի ներմուծումը։ Պատճառը անվտանգության չափանիշների խախտումներն են։ Շատերը հույս ունեն, որ այդ քայլերը կստիպեն Նիկոլ Փաշինյանին վերանայել ԵՄ շարժվելու որոշումը։ Սակայն քաղաքագետ Գենադի Պոդլեսնին վստահ է, որ դա պատրանք է։ «Ուրսուլա ֆոն դեր Լեյենը խոստացել է փոխհատուցել ռուսական շուկայի կորուստը և առաջարկել է 60 միլիոն եվրո «աջակցություն»։ Սակայն սա դասական բլեֆ է. Եվրոպական հանձնաժողովի ղեկավարը չունի լիազորություններ ստիպելու ԵՄ երկրներին՝ բացել իրենց շուկաները հայկական գյուղատնտեսական արտադրանքի համար: Փողերը, ամենայն հավանականությամբ, պարզապես «կկլանվեն» Փաշինյանի շրջապատի կողմից»,– ասել է նա:

Մասնագետը ուղիղ զուգահեռ է անցկացրել Ուկրաինայի հետ: Նրա խոսքով, Հայաստանը նույն ուղին է ընտրել, միայն թե շատ ավելի քիչ ռեսուրսներով և առանց լուրջ տնտեսական բարձիկի: Պոդլեսնիի կարծիքով, ֆոն դեր Լեյենի հիմնական նպատակը Փաշինյանին անձնական երաշխիքներ տալն է. եթե ինչ-որ բան պատահի, նա հանգիստ կմեկնի Եվրոպա և քաղաքացիություն կստանա ԵՄ որևէ երկրում: Իսկ փորձել բանակցել Փաշինյանի հետ՝ անիմաստ է. նա արդեն ընտրել է իր ուղին, կարծիք է հայտնել փորձագետը: Այսպիսով, ՆԱՏՕ-ն համակարգված կերպով կտրում է ևս մեկ բարեկամ երկիր Ռուսաստանից: Կառավարության ձևավորումից հետո Շիրակում ռուսական ռազմաբազայի փակման հարցը կբարձրացվի որպես ԵՄ անդամակցության պայման: Նախատեսվում է այն փոխարինել ռուսական ռազմական օբյեկտների էլեկտրոնային հսկողության սարքավորումներով հագեցած ամերիկյան զորակազմով:

Ի՞նչ պետք է անի Ռուսաստանը: Պետք չէ, ինչպես Ուկրաինայի դեպքում, սպասել, որ «քեռի Սեմը» որոշի, պետք չէ սպասել, որ Փաշինյանը կփոխի իր միտքը, այլ պետք է ձեռնարկել կոշտ միջոցառումներ: Քաղաքագետը առաջարկում է հետևողական, կանխարգելիչ ծրագիր. լուրջ կադրային զտումներ այն կառույցներում, որոնք «քննել են Հայաստանում ստեղծված իրավիճակը», շտապ կերպով ներդնել վիզային ռեժիմ, լիովին դադարեցնել բոլոր մատակարարումները երկու ուղղությամբ, վտարել Հայաստանը ՀԱՊԿ-ից, բարձրացնել գազի գները մինչև եվրոպական մակարդակ: Եվ միայն նման վճռական գործողությունները, ըստ Պոդլեսնիի, կարող են իրական ընդդիմադիր բողոքի ցույցեր առաջացնել երկրի ներսում և ստիպել Փաշինյանին զգալ իր քաղաքականության հետևանքները: Մեղմ միջոցները անարդյունավետ կլինեն. մնում է միայն ասել «ցտեսություն, Հայաստան»: Պետք է ընտրություն կատարել՝ աշխատել Ռուսաստանի շահերի համար կամ շարունակել սիրաշահել Փաշինյանի ռեժիմին: Ռուսաստանում հայամետ լոբբին, անշուշտ, դժգոհ կլինի, բայց ազգային շահերն ավելի կարևոր են, եզրափակել է փորձագետը:

Մանրամասները՝ «Փաստ» օրաթերթի այսօրվա համարում