Փոխվարչապետ Մհեր Գրիգորյանը մասնակցել է «Նորդիկ օրեր» փառատոնին
ՄՇԱԿՈՒՅԹ
Փոխվարչապետ Մհեր Գրիգորյանը մասնակցել է «Նորդիկ օրեր» փառատոնի շրջանակներում Նորդիկ երկրների ազգային տոներին նվիրված միջոցառմանը և հանդես է եկել շնորհավորական ուղերձով։
«Ձերդ գերազանցություններ,
Հարգելի գործընկերներ,
Տիկնայք և պարոնայք,
Մեծ պատիվ է ողջունել ձեզ Հայաստանում առաջին անգամ կազմակերպվող «Նորդիկ օրեր» փառատոնի շրջանակում։
Հայաստանի Հանրապետության կառավարության և անձամբ իմ անունից շնորհավորում եմ Դանիայի, Նորվեգիայի և Շվեդիայի ազգային օրերի, ինչպես նաև Ֆինլանդիայի Պաշտպանության ուժերի օրվա առթիվ։
Այս առիթը մեզ հնարավորություն է տալիս արժևորելու այն գաղափարներն ու սկզբունքները, որոնց վրա հիմնված են Նորդիկ պետությունները՝ ժողովրդավարությունը, մարդու իրավունքները, օրենքի գերակայությունը, սոցիալական համերաշխությունը, ինչպես նաև կրթության և նորարարության նկատմամբ առանձնահատուկ վերաբերմունքը։
Նորդիկ երկրների փորձը վկայում է, որ կայուն և մրցունակ պետությունները շարունակաբար զարգանում են ոչ միայն տնտեսական առաջընթացի, այլև մարդու արժանապատվության նկատմամբ հարգանքի և հանրային վստահության շնորհիվ։ Այս սկզբունքները ոչ միայն ապահովել են ձեր տարածաշրջանի կայուն զարգացումն ու բարեկեցությունը, այլև դարձել են օրինակ միջազգային հանրության համար։
Մենք բարձր ենք գնահատում Նորդիկ երկրների ներդրումը համաշխարհային խաղաղության, կայուն զարգացման և միջազգային համագործակցության ամրապնդման գործում։Այս փորձը հատկապես կարևոր է ժամանակակից մարտահրավերների պայմաններում, երբ պետությունների միջև սերտ համագործակցությունն առավել քան երբևէ անհրաժեշտ է։
Ուրախությամբ արձանագրում ենք, որ մեր երկրների միջև ձևավորվել են բարեկամական հարաբերություններ, որոնք հիմնված են փոխադարձ հարգանքի, վստահության և ընդհանուր արժեքների վրա։ Համոզված ենք, որ այդ կապերը հետագայում ևս կշարունակեն զարգանալ՝ նպաստելով տնտեսական, մշակութային, կրթական և գիտական համագործակցության ընդլայնմանը։
Հայաստանի Հանրապետության կառավարությունը բարձր է գնահատում նաև Նորդիկ երկրների հետևողական աջակցությունը Հայաստան–Եվրոպական միություն գործընկերության խորացման և մեր երկրում իրականացվող բարեփոխումների առաջմղման գործում։
Եվս մեկ անգամ շնորհավորում եմ Նորդիկ երկրների ժողովուրդներին՝ մաղթում եմ խաղաղություն, բարօրություն և առաջընթաց։
Շնորհակալություն ուշադրության համար»,– ասել է նա ուղերձում:
