Հայաստանին ժամանակ են տվել մինչև դեկտեմբեր

ԵԱՏՄ առաջնորդները Հայաստանին ժամանակ են տվել մինչև դեկտեմբեր։ Բելառուսի, Ղազախստանի, Ղրղզստանի և Ռուսաստանի նախագահները ԵԱՏՄ նիստում որոշել են, որ Հայաստանի նկատմամբ Եվրասիական տնտեսական միության մասին պայմանագրի գործողության դադարեցման հնարավոր հետևանքները 2026 թվականի դեկտեմբերի նիստի ժամանակ կզեկուցեն ԵԱՏՄ միջկառավարական խորհրդում այդ չորս երկրների անդամները։ ԵԱՏՄ անդամ չորս պետությունների ղեկավարներն Աստանայում ընդունած հայտարարությամբ, որը հրապարակված է Կրեմլի պաշտոնական կայքէջում, նաև «կիսում են Հայաստանում հնարավորինս կարճ ժամկետներում Եվրամիությանն անդամակցելու կամ Եվրասիական տնտեսական միության կազմում մնալու հարցով հանրաքվե անցկացնելու անհրաժեշտության վերաբերյալ դիրքորոշումը»։

Նիստից հետո, որին Հայաստանից Փաշինյանի փոխարեն մասնակցել է փոխվարչապետ Մհեր Գրիգորյանը, ՌԴ նախագահ Վլադիմիր Պուտինը հայտարարել է, թե Հայաստանը Եվրասիական տնտեսական միությունից դուրս գալու դեպքում կկորցնի հասանելիությունն ազատ առևտրի համաձայնագրերին։ Ռուսաստանի նախագահը հայտարարել է, որ Հայաստանը պետք է մտածի, թե որ շուկա կգնա իր գյուղատնտեսական արտադրանքը, եթե ԵԱՏՄ-ի հետ տնտեսական կապերը խզվեն։

Պուտինը նաև նկատել է, թե էներգակիրների գների աճը Հայաստանի համար կհանգեցնի երկրի ՀՆԱ-ի առնվազն 14 տոկոսի կորստի. «Եվրոպայում գազի գինը շուրջ 600 եվրո է, իսկ Հայաստանի համար՝ շուրջ 150 եվրո։ Բայց սա միակ առավելությունը չէ»։

Նիկոլ Փաշինյանի հակառուսական քաղաքականությունը, ԵԱՏՄ-ի դեմ կատարած քայլերը, ի վերջո, ակնհայտ է, որ պետք է նյարդայնացնեին այդ կառույցի ղեկավարներին, առավել ևս, որ Փաշինյանը համառորեն հրաժարվում է մասնակցել ոչ միայն ՀԱՊԿ-ի և ԱՊՀ-ի նիստերին, այլ նաև ԵԱՏՄ համապատասխան կառույցների աշխատանքներին՝ իր փոխարեն ուղարկելով միայն Մհեր Գրիգորյանին։ Ռուսաստանից էլ, վերջին շրջանում ահագնացող հայտարարություններից բացի, արդեն կոշտ հարցադրումներ են անում, պահանջում մանրամասն պատասխան՝ ի վերջո, Հայաստանը ընտրո՞ւմ է Եվրամիությունը, թե՞ Եվրասիական տնտեսական միությունը։

Հայաստանի իշխանությունները համառորեն հրաժարվում են պատասխանել, բայց և չեն դադարեցնում իրենց հակառուսական քայլերը։ Ըստ էության, Հայաստանին մինչև դեկտեմբեր ժամանակ է տրվել, որից հետո արդեն լուրջ որոշում կկայացնեն, թե ինչ են ուզում անել մեր երկրի հետ։

Անի Բալայան