«Մնացել է դեղձի հետ. Հայաստանը չի գտնի Ռուսաստանին փոխարինող մրգերի գնորդներ»
ՔԱՂԱՔԱԿԱՆՈՒԹՅՈՒՆ
Թուրքիայի մրցակցության պատճառով Հայաստանը չի կարողանա Ռուսաստանին փոխարինող մրգերի և բանջարեղենի գնորդներ գտնել, nsn.fm-ի հետ զրույցում ասել է տնտեսագետ և Կովկասի ինստիտուտի փորձագետ Հրանտ Միքայելյանը։ Հիշեցնենք, որ Ռուսաստանն արդեն կասեցրել է ծաղիկների, Ջերմուկ հանքային ջրի, կոնյակի և գինու երեք ապրանքանիշերի Հայաստանից ներմուծումը։ Ռոսսելխոզնադզորի տվյալներով կան նաև հարցեր մրգերի և բանջարեղենի վերաբերյալ։
Միքայելյանը բացատրել է այդ որոշումների հետևանքները։ «Նախ, այս տարվա բերքը շատ լավը չէ, ուստի արտահանման ներուժը, այնուամենայնիվ, սահմանափակ է։ Երկրորդ, արգելքը լիակատար չէ, այլ ժամանակավոր։ Կարծում եմ, որ որոշ տնային տնտեսությունների վրա արգելքների ազդեցությունը զգալի կլինի, մակրոտնտեսական մակարդակում այն աղետալի չի լինի, բայց կլինի նկատելի։ Հայաստանի համապատասխան մարմինները պատրաստ են համագործակցել և պլանավորում են աշխատել այդ խնդիրները լուծելու ուղղությամբ, սակայն շատ պաշտոնյաներ ներկայումս նախընտրական արձակուրդում են և աշխատում են այլ հարցերի վրա։ Դա որոշակի սահմանափակումներ է դնում նրանց աշխատանքի վրա», - ասել է տնտեսագետը։
Այնուամենայնիվ, նա ընդգծել է, որ դեռևս հնարավոր չէ գտնել այլ գնորդներ։ «Մատակարարների որոշակի դիվերսիֆիկացում կփնտրվի, սակայն պետք է հասկանալ, որ այդ առումով հնարավորությունները շատ սահմանափակ են։ Դրան նպաստում է նաև Թուրքիայի ներկայությունը, որն ունի ավելի մեծ մշակովի տարածքներ և նմանատիպ կլիմա։ Թուրքական մրցակցությունը, հավանաբար, հնարավորություն չի ընձեռի զարգացնելու նոր տարածքներ և շուկաներ։ Ավելին, վերջին տարիներին գյուղատնտեսության բաժինը Հայաստանի եկամուտներում նվազում է. այն առաջնահերթ ոլորտ չէ։ Այսինքն դա այդքան էլ էական ազդեցություն չի ունենա բյուջեի եկամուտների վրա»,-եզրափակել է nsn.fm-ի զրուցակիցը։
Հայաստանը հիմնականում այնպիսի կորիզավոր մրգեր է մատակարարում, որոնք գրեթե չեն աճեցվում Ռուսաստանում։ Դրանց ներմուծման ծավալների կրճատումը կհանգեցնի սպառողների համար գների բարձրացման։ Այս մասին nsn.fm-ին ասել է FruitNews լրատվական գործակալության գլխավոր տնօրեն և Berry Academy նախագծի ղեկավար Իրինա Կոզիյը։
Նյութը հրապարակման պատրաստեց Կամո Խաչիկյանը
www.1or.am
