ՌԴ-ն Հայաստանին է փոխանցել Հարավկովկասյան երկաթուղու կոնցեսիայի վերաբերյալ անհրաժեշտ պարզաբանումները

Ռուսաստանը Հայաստանին է ուղղել Հարավկովկասյան երկաթուղու (ՀԿԵ) կոնցեսիայի վերաբերյալ իր բոլոր մտահոգությունները, ՏԱՍՍ-ին ասել է Ռուսաստանի արտաքին գործերի նախարարության ԱՊՀ երկրների չորրորդ դեպարտամենտի տնօրեն Միխայիլ Կալուգինը։

«Այս հարցը (ՀԿԵ կոնցեսիան – ՏԱՍՍ-ի նշում) մանրամասն քննարկվել է ապրիլի 1-ին Ռուսաստանի և Հայաստանի ղեկավարների միջև կայացած բանակցությունների ժամանակ։ Պարզաբանվել են հայկական կողմի բոլոր մտահոգությունները, և համաձայնություն է ձեռք բերվել հետագա աշխատանքների վերաբերյալ, այդ թվում՝ տարածաշրջանային հաղորդակցությունների ապաշրջափակմանը Ռուսաստանի մասնակցության համատեքստում», – նշել է դիվանագետը։

Նա ընդգծել է, որ Մոսկվան «արձանագրել է Փաշինյանի հայտարարությունը, որ հանրապետությունը մտադիր չէ քննարկել կոնցեսիայի հետ կապված հարցերը «Ռուսաստանի մեջքի ետևում»։

«Մենք չենք կարող համաձայնվել այն պնդման հետ, որ ռուսական ընկերության կողմից Հայկական երկաթուղիների կառավարումը որևէ կերպ սահմանափակում է Հայաստանի մրցակցային առավելությունները. ընդհակառակը, մենք համոզված ենք, որ դա ստեղծում է դրանք», – նշել է Կալուգինը։ Նրա կարծիքով՝ «եթե ռուսական կողմի կողմից երկաթուղային ցանցի ֆունկցիոնալության վերականգնման և պահպանման կոնցեսիոն պայմանագրի շրջանակներում կատարված մանրակրկիտ աշխատանքը չլիներ, այսօր ավելի դժվար կլիներ քննարկել Հարավային Կովկասում տրանսպորտային մայրուղիների «վերագործարկման հարցում» Հայաստանի մասնակցության հեռանկարները»։

Ռուսաստանի արտաքին գործերի նախարարության դեպարտամենտի տնօրենը հիշեցրել է, որ «2008 թվականից ի վեր Հայկական երկաթուղիներում ներդրումները կազմել են մոտ 30 միլիարդ ռուբլի։ Բացի այդ, Հայաստանի բյուջե է մուտքագրվել մոտ 15 միլիարդ ռուբլի, որի մի մասն օգտագործվել է շարժակազմի արդիականացման համար»։

«Ի դեպ, նոր գնացքներից մեկը՝ Երևան-Գյումրու երթուղու համար, փորձարկվել է անմիջապես վարչապետի և Հայաստանի ղեկավարության այլ ներկայացուցիչների կողմից», – նշել է Կալուգինը։ Նա վստահ է, որ ՀԿԵ-ն մնում է հանրապետության խոշորագույն գործատուներից մեկը՝ ապահովելով մոտ 2500 աշխատատեղ։