Իրավապահ համակարգը վաղուց ձախողել է իր հիմնական առաքելությունը
ՎԵՐԼՈՒԾՈՒԹՅՈՒՆՆԵՐ
Վեդիում անչափահաս քույրերի նկատմամբ տեղի ունեցած առերևույթ դեպքի կապակցությամբ հանրային քրեական հետապնդում է հարուցվել երկու անձի նկատմամբ։ Դատախազությունից նշել են, որ մոտ 60-ամյա երկու տղամարդկանց ձերբակալել են, կալանքի միջնարդություն ներկայացրել։ Սեռական բռնության մասին առաջին ահազանգից երեք ամիս անց ու միայն լրագրողների բացահայտումներից հետո են երկու տղամարդիկ նախօրեին գիշերը առերեսվել Վեդիում բնակվող անչափահաս աղջիկներից մեկի հետ։ Անչափահասների հանդեպ սեռական բռնության առաջին ահազանգը դեռ փետրվարի 12-ին է եղել, երկրորդը՝ ապրիլի 22-ին:
Երեկ հայտնի դարձավ, որ ձերբակալել են նաև Ջրվեժի 19-ամյա մի բնակչի, ով, Մյասնիկյան պողոտայում մեքենան անկանոն վարելով, առանց վկայական ունենալու, և ուղիղ եթերում լկտիություն ցուցաբերելով, խոշոր վթարի մեղավոր էր դարձել։ Ընդ որում, այդ երիտասարդը նույնիսկ վթարից հետո էր ուղիղ եթերում լկտիացել, ծաղրել էր իր իսկ կատարած հակահասարակական արարքը։
Երկու դեպքում էլ ձերբակալման որոշում կայացվեց միայն հանրային լուրջ ալիքից հետո։ Վեդիի դեպքով լրագրողների ու փաստաբանների պայքարից հետո, իսկ վթարի դեպքում՝ սոցցանցերում բարձրացված աղմուկից հետո։ Ի վերջո, մեղավորները, հո՜ ընդդիմադիրները չէին, որ անմիջապես ձերբակալեին, կալանավորեին աննշան զանցանքների համար։ Ըստ էության, ՀՀ իրավապահ համակարգը վաղուց ձախողել է իր հիմնական առաքելությունը, հասարակ մարդիկ անպաշտպան են, իսկ ոստիկանությունն ու քննչականը դարձել են Փաշինյանի ու իր թիմի անձնական թիկնապահը։ Եվ այս անարդարությունն է, որ, իվերջո, մի օր ժայթքելու և հողին է հավասարեցնելու գործող իշխանությանը։
Կարինե Առաքելյան
