Հնդկաստանում թռիչքի մեկնարկի պահին բռնկվել է ինքնաթիռի շարժիչը. տուժել է վեց ուղևոր

Swiss International Airlines ավիաընկերության Դելի — Ցյուրիխ երթուղով LX147 չվերթը ստիպված է եղել արտակարգ կերպով ընդհատել թափավազքը Նյու Դելիի Ինդիրա Գանդիի անվան օդանավակայանի թռիչքուղու վրա՝ շարժիչի բռնկման պատճառով, հայտնում է Times of India-ն:

Ինքնաթիռի ուղևորները տարհանվել են հենց թռիչքուղու վրա՝ օգտագործելով վթարային փչովի սահուղիները:

Միջադեպը տեղի է ունեցել կիրակի օրը՝ տեղական ժամանակով ժամը 01:08-ի սահմաններում, երբ Airbus A330-ը սկսել է թափավազքը թռիչքի համար: Ավիաընկերության տվյալներով, թիվ մեկ շարժիչը խափանվել է, որից հետո հրդեհ է սկսվել: Անձնակազմն անմիջապես ընդհատել է թռիչքը և որոշում կայացրել տարհանել ուղևորներին:

Օդանավում եղել է 232 մարդ, այդ թվում՝ չորս մանկահասակ երեխա, ինչպես նաև անձնակազմի անդամները: Բոլոր ուղևորները տարհանվել են վթարային սահուղիներով:

Միջադեպի հետևանքով վեց ուղևոր վնասվածքներ է ստացել և հոսպիտալացվել: Նրանք գտնվում են բժիշկների հսկողության տակ:

Ավիաընկերությունը հայտարարել է, որ անձնակազմը չի տուժել: Նշվում է նաև, որ ուղևորների մի մասը, որոնք չեն կարողացել օգտվել սահուղիներից, տարհանվել են վթարային սանդուղքներով:

Պատահարից հետո թռիչքուղին ժամանակավորապես փակվել է, քանի որ ինքնաթիռը մնացել է այնտեղ մինչև նախնական ընթացակարգերի ավարտը:

Ավիաընկերությունը հայտնել է, որ ստեղծվել է հատուկ խումբ՝ շարժիչի խափանման պատճառները հետաքննելու համար: Տեխնիկական մասնագետները կուղարկվեն Դելի՝ ինքնաթիռը զննելու և իրավիճակի հետագա վերլուծության համար: Միաժամանակ ավիաընկերությունը կազմակերպում է ուղևորներին տոմսերի տրամադրումն ու տեղավորումը:

SWISS-ի ներկայացուցիչներն ընդգծել են, որ ուղևորների և անձնակազմի անվտանգությունը մնում է բացարձակ առաջնահերթություն: