Փորձագետը Հայաստանում նախընտրական անորոշության մասին. «Խաղադրույքները չափազանց բարձր են»

Քաղաքական դիտորդ Հակոբ Բադալյանը կարծիք է հայտնել, որ հանրապետությունում միասնական ընդդիմադիր ճակատի ձևավորումը քիչ հավանական է, սակայն իշխանափոխության ձգտող ընտրողների մեծ մասը կբաժանվի իշխող «Քաղաքացիական պայմանագիր» կուսակցությանը հակառակվող ուժերի շատ սահմանափակ շրջանակի միջև, հաղորդել է «Սպուտնիկ Արմենիան», գրում է ritmeurasia.ru–ն:

Փորձագետի կարծիքով, որոշ ընդդիմադիր ուժեր կարող են վերջին պահին դուրս գալ և կոչ անել իրենց ընտրողներին քվեարկել ավելի «անցանելի» թեկնածուի օգտին։ Ապրիլի 13-ին Հայաստանի Կենտրոնական ընտրական հանձնաժողովը բացել է հունիսի 7-ին կայանալիք խորհրդարանական ընտրություններին մասնակցելու համար կուսակցությունների և դաշինքների դիմումների ընդունման գործընթացը։

Բադալյանը նշել է, որ որոշ ուժեր չեն շտապում ներկայացնել իրենց փաստաթղթերը 10-օրյա ժամկետը լիարժեք օգտագործելու, ամեն ինչ մանրակրկիտ պլանավորելու և իրենց գործողությունները համակարգելու համար։ Նրա կարծիքով, նախընտրական ծրագրերը ներկայացնելու պասիվությունը զուտ կազմակերպչական և տեխնիկական բնույթ ունի։ «Անսովոր լարված անորոշության մթնոլորտի վերաբերյալ, կարծում եմ, որ խաղադրույքները շատ բարձր են բոլոր մակարդակներում, թե՛ ներքին, թե՛ արտաքին քաղաքականության մեջ, և այդ հանգամանքը բոլոր կողմերին դրդում է դիտարկել հնարավոր ռիսկերը և նոր, արդյունավետ տարբերակները», - ընդգծել է Բադալյանը։

Փորձագետը կասկածանքով է մոտենում ընդդիմության ձայների ուղղակի ամփոփման ազդեցությանը հիշեցնելով «ձայների փոխադրելիության խնդիրը». եթե մեծամասնությունը դեմ է կառավարությանը, դա ավտոմատ կերպով չի վերածվում որևէ ընդդիմադիր ուժի աջակցության։ Նա համոզված է, որ կլինեն կուսակցություններ, որոնք ընդդիմության քողի տակ իշխանություններին կմատուցեն ձայները փոշիացնելու ծառայություն, և դրանք առաջին հերթին իշխող «Քաղաքացիական պայմանագիր» կուսակցության շրջանակներում գործող արևմտամետ և հակառուսական ուժերն են։

Բադալյանի խոսքով կուսակցությունները, որոնք շանս չունեն հաղթահարելու անցողիկ շեմը, պետք է հայտարարեն իրենց աջակցությունը այլ ընդդիմադիր ուժերին կամ դուրս գան ընտրարշավից, ինչը կծառայի որպես վարքային նշիչ և կհաստատի այն, որ նրանք մտադիր չեն փոշիացնել ընտրողների ձայները։

Նյութը հրապարակման պատրաստեց Կամո Խաչիկյանը

www.1or.am