Ինչ փոփոխություններ են կատարվել կաթի և կաթնամթերքի փորձաքննության կարգում. «Փաստ»

«Փաստ» օրաթերթը գրում է.

Էկոնոմիկայի նախարարությունն առաջարկում է փոփոխություններ և լրացումներ կատարել «Կաթի և կաթնամթերքի անասնաբուժասանիտարական փորձաքննության կարգը սահմանելու մասին» և մի շարք այլ որոշումներում։ Նախագծերի փաթեթի ընդունման անհրաժեշտությունը պայմանավորված է այն հանգամանքով, որ առավել նպատակահարմար է, որ կաթի և կաթնամթերքի անասնաբուժասանիտարական փորձաքննության իրականացման կարգը սահմանված լինի կառավարության առանձին որոշմամբ, քանի որ գործող կարգում չկան սահմանված կաթի ընդունման կետի, կաթ ընդունողի և փորձաքննության հետ կապված հասկացությունները։ Խմբաքանակի և փորձաքննության հետ կապված կան առանձնակի յուրահատկություններ, ինչին մշտապես բախվում են տնտեսվարողները, մասնավորապես նախագծում սահմանվել են առանձին և միավորված խմբաքանակ հասկացությունները, վերամշակման ենթակա կամ շուկաներում վաճառքի ենթակա կաթը, ինչ պարբերականությամբ պետք է իրականացվի լաբորատոր փորձաքննություն և ինչ ժամկետներում։ Սահմանվել են նաև նմուշների վերադարձման ակտի ձևի հետ կապված դրույթներ, ինչպես նաև, թե որ արտադրանքը անասնաբուժասանիտարական փորձաքննության ենթակա չէ։

Նշվում է, որ անասնաբուժասանիտարական փորձաքննությունն այլևս գործունեության ծանուցման տեսակ չի համարվում, հետևաբար նախագծում սահմանվել է դրույթ, որ փորձաքննությունը սոմատիկ բջիջների, պոտենցիալ վտանգավոր նյութերի, թունավոր տարրերի, միկոտոքսինների, թունաքիմիկատների, ռադիոնուկլիդների, միկրոօրգանիզմների, այդ թվում՝ պաթոգենների առկայությունը պարզելու համար, անասնաբուժական դեղամիջոցների օգտագործման պարունակության նկատմամբ անհրաժեշտ է իրականացնել միայն հավատարմագրված լաբորատորիաներում։

Սա հաշվի առնելով՝ փոփոխություն է կատարվել նաև կառավարության 2021 թվականի փետրվարի 11-ի N 156-Ն որոշման մեջ, այն է՝ կաթին և կաթնամթերքին վերաբերող դրույթները անհրաժեշտ է ուժը կորցրած ճանաչել։ Միաժամանակ անհրաժեշտ է նաև փոփոխություններ կատարել կառավարության 2010 թվականի հոկտեմբերի 21-ի N 1499-Ն որոշման մեջ։ Որոշման N 2 ձևում ևս կատարվել է փոփոխություն։ N 2 ձևի անասնաբուժական վկայականը համայնքը սպասարկող անասնաբույժի կողմից տրամադրելուց անասնաբույժը պետք է լրացնի նաև տեղեկատվություն կենդանու հիվանդությունների բացակայության վերաբերյալ և նշվի, որ կաթի տվյալ խմբաքանակը ստացվել է առողջ կենդանուց, ինչպես նաև նշի, որ մարզից, համայնքից, բնակավայրից է հավաքվել կաթը և հավաքման ժամը։ N 2 ձևի անասնաբուժական վկայականը տրամադրվում է նաև վերամշակման, պահման, պահպանման նպատակով, հետևաբար այս համատեքստում փոփոխություն է կատարվել նաև վերնագրում։

Փոփոխություն է կատարվել նաև կառավարության 2011 թվականի հունվարի 20-ի N 34-ն որոշման մեջ։ Որոշումը լրացվել է նոր գլխով, որտեղ սահմանվել են կաթի ընդունման կետին ներկայացվող առանձնակի պահանջները, քանի որ Հայաստանի օրենսդրությամբ չկան սահմանված կաթի ընդունման կետին ներկայացվող պահանջներ, և այս համատեքստում բացակայում են համապատասխան ստուգաթերթերը, որպեսզի Սննդամթերքի անվտանգության տեսչական մարմնի պետական վերահսկողություն իրականացնող տեսուչը իրականացնի ստուգում։ Ստուգումները իրականացվում են իրացման ստուգաթերթերի շրջանակներում, իսկ հստակ պահանջների սահմանման դեպքում տեսուչները ստուգումներ իրականացնելիս կառաջնորդվեն այն ստուգաթերթով, որտեղ նախագծի ընդունումից հետո լրացում կկատարվի կառավարության 2022 թվականի օգոստոսի 11-ի N 1266-Ն որոշման մեջ։ Սահմանվել են նաև կաթի փոխադրմանը ներկայացվող պահանջները։

Միաժամանակ համաձայն «Սննդամթերքի անվտանգության մասին» օրենքի 6-րդ հոդվածի 1-ին մասի 14-րդ կետում սահմանվել է «սննդամթերքի հիգիենային, ինչպես նաև սննդամթերքի առանձին տեսակների հիգիենային ներկայացվող առանձնակի պահանջների հաստատումը» լիազորող նորմը։

Մանրամասները՝ «Փաստ» օրաթերթի այսօրվա համարում