Ադրբեջանը բացահայտ աջակցում է Փաշինյանին

Խորհրդարանական ընտրություններին ընդառաջ Բաքվից այլևս բացահայտ Նիկոլ Փաշինյանին աջակցելու կոչեր են հնչում։ Ադրբեջանի նախկին արտգործնախարար Էլմար Մամեդյարովը հայտարարել է, թե Ռոբերտ Քոչարյանը չի կարողանա մարդկանց մոբիլիզացնել, իսկ Փաշինյանի շանսերն ավելի շատ են։ Մամեդյարովը, քննարկելով Քոչարյանի շանսերը ընտրություններում, նշել է, որ դրանք շատ չեն։ Նրա խոսքով՝ հնարավոր է Քոչարյանը ինչ-որ տոկոս հավաքի և անցնի խորհրդարան, բայց դառնալ վարչապետ, նույնիսկ հնարավոր կոալիցիայի պարագայում, քիչ իրատեսական է։

«Նայեք իրավիճակին։ Քոչարյանը հրաժարվեց հանրահավաքներ հավաքելու գաղափարից, որովհետև գիտի՝ չի կարողանա մարդկանց մոբիլիզացնել։ Վերջին իրադարձությունները ցույց տվեցին, որ նույնիսկ վճարովի մասնակիցների հաշվառմամբ հանրահավաքներին եկել է 10–12 հազար մարդ։ Դա կաթիլ է ծովում։ Փաշինյանն իր ժամանակին՝ 2018 թվականին, հրապարակներում հավաքում էր ավելի քան 100 հազար մարդ, երբ հեռացնում էր Սերժ Սարգսյանին։ Հայաստանի բնակչությունը հոգնել է այդ քոչարյաններից, կարապետյաններից, սարգսյաններից և այդպես շարունակ։ Մարդիկ նրանց չեն հավատում։ Սկզբունքորեն չեն հավատում մեծ փողերին։ Այնպես որ այս դեպքում, ինձ թվում է, Փաշինյանի շանսերն ավելի շատ են»,- եզրափակել է Էլմար Մամեդյարովը՝ ակնհայտ ստելով։

Իհարկե, ինչ-որ մեկը կարող է հայտարարել, թե Բաքուն այսպիսի հայտարարություններով արջի ծառայություն է մատուցում Փաշինյանին։ Սակայն փաստն այն է, որ Ադրբեջանում խիստ անհանգստացած են ՀՀ գործող իշխանությունների հնարավոր պարտությամբ և անցել են բաց խաղաքարտերով խաղի։

Աննա Մարգարյան