Արման Ծառուկյանին և նրա ուղեկիցներին ինքնաթիռից իջեցրել են. ինչ է տեղի ունեցել

UFC-ի թեթև քաշային կարգի դասակարգման երկրորդ համար Արման Ծառուկյանին և նրա ուղեկիցներին են ինքնաթիռից իջեցրել թռիչքին նախապատրաստվելու ժամանակ բջջային հեռախոսից օգտվելու պատճառով։ Հետո պարզվել է Ծառուկյանն ու նրա ընկերներն ինքնաթիռի տեղաշարժման (գետնավարման) ժամանակ կանգնած են եղել միջանցքում և հրաժարվել են նստել իրենց տեղերը։ Անձնակազմի անդամները խնդրել են զբաղեցնել նստատեղերը, ինչից հետո անտեսման պատճառով որոշում է կայացվել վերադառնալ նստեցման տեղամաս։

Ամերիկյան «American Airlines» ավիաընկերության ներկայացուցիչները Լոս Անջելեսից Ֆիլադելֆիա մեկնող չվերթի միջադեպի վերաբերյալ հայտնել են, որ նրանք հրաժարվել են ենթարկվել դաշնային կանոններին։

«Ապրիլի 16-ին «American Airlines»-ի 513 չվերթը վերադարձել է Լոս Անջելեսի միջազգային օդանավակայանի նստեցման գոտի այն ուղևորների պատճառով, որոնք հրաժարվել են ենթարկվել դաշնային կանոններին։ Անվտանգությունը մեր գլխավոր առաջնահերթությունն է։ Եվ մենք ակնկալում ենք, որ մեր ուղևորները կհետևեն անձնակազմի ցուցումներին, ներառյալ՝ կմնան իրենց տեղերում ինքնաթիռի տեղաշարժի ժամանակ»,- հայտնել է ընկերությունը։

Չորս հոգի, այդ թվում՝ Ծառուկյանը, հեռացվել են չվերթից, իսկ ինքնաթիռը դրանից հետո մեկնել է Ֆիլադելֆիա։

Հայ մարզիկը Ֆիլադելֆիա պետք է մեկներ մասնակցելու «RAF 8» մրցաշարին, որտեղ նախատեսված է ամերիկացի Յուրայա Ֆեյբերի դեմ գոտեմարտը։