Բերման են ենթարկվել «Ուժեղ Հայաստան» կուսակցության համակիրներ, ընտրական ցուցակի ներկայացուցիչ. Գոհար Մելոյան
ԻՐԱՎՈՒՆՔ
Բերման են ենթարկվել «Ուժեղ Հայաստան» կուսակցության համակիրներ, ընտրական ցուցակի ներկայացուցիչ։ Այս մասին իր ֆեյսբուքյան էջում հայտնել է «Ուժեղ Հայաստան» կուսակցության անդամ Գոհար Մելոյանը:
«Առավոտվանից արշավ է մեր քաղաքական ուժի՝ «Ուժեղ Հայաստան»-ի նկատմամբ, խուզարկություններ են, բերման են ենթարկվել մեր համակիրներ և մեր ցուցակի կին ներկայացուցիչ: Մենք հիմա ուղևորվում ենք Հակակոռուպցիոն Կոմիտե՝ Մոսկովյան 1 հասցե, այս պահի դրությամբ ահազանգում եմ, որովհետև իրավապահ մարմինները խոչընդոտում են փաստաբանների մուտքը, թույլ չեն տալիս մարդկանց պաշտպանության իրավունքի իրացումը, կարծում եմ տրամաբանական ու հասկանալի է պատճառը:
Բավականին մտահոգիչ է, որ թիրախավորվում են կանայք, բայց մենք ու հայ ժողովուրդը արդեն ցույց ենք տվել, որ յուրաքանչյուր մեկ անձի, երբ փորձում եք մեկուսացնել հայրենիքի համար պայքարի ճանապարհից, փոխարենը 10 հոգի համալրում է մեր շարքերը: Փոքրիկ խմբակին էլ կոչ՝ ինչպես ասել էր մեր համակարգող ղեկավար Նարեկ Կարապետյանը, փորձեք այս կռիվը տղամարդավարի իրականացնել:
Այս պահին և ընտրական իրավունքի, և ընտրական գործընթացի հավասարության սկզբունքն է բացահայտ խախտվում: Սրանք միջամտություններ են, ու մեր քաղաքական ուժի համար անհավասար պայմաններ են ստեղծվում, կանանց իրավունքների տեսանկյունից էլ, արդյո՞ք նորմալ է, որ կնոջը թիրախավորում են սեռով պայմանավորված և փորձում են ընկճել պայքարից՝ ասելով գնա, խոհանոցում գործ արա, այնպես որ, հարգելիներս, կհանդիպենք քիչ անց»,- նշել է Մելոյանը:
