Ծանոթ ու միաժամանակ անհայտ … Կոսկենկորվա օղի

Միգուցե և ռուսներն են օղին հորինել, բայց թերևս ֆիններն են այդ ըմպելիքի արտադրության մեջ հասել ամենամեծ հաջողությունների։ Դա հաստատում է Koskenkorva (կարդացվում է Կոսկենկորվա) ֆիննական օղին՝ պերֆեկցիոնիստական ալկոհոլային խմիչքը։ Դասական Koskinkorva օղին բաղկացած է ընդամենը երկու բաղադրիչից՝ սառցադաշտային ջրից և ավելի քան 200 անգամ թորած ալկոհոլից։ Այս պահին սա օղու արտադրության ամենաառաջադեմ տեխնոլոգիան է։ Այդ ըմպելիքն այսօր ժամանակակից Ֆինլանդիայի խորհրդանիշներից է, ֆինների խիզախության և աշխատասիրության խորհրդանիշը։

Ֆինները դարեր շարունակ ալկոհոլային խմիչքներ են պատրաստել: Ալկոհոլային ավանդույթները հատկապես զարգացած են երկրի արևմտյան ափին և հարավում՝ Օստրոբոտնիայի պատմական շրջանում։ Ի դեպ, այդ ֆիննական օղին իր անունը ստացել է ի պատիվ Օստրոբոտնիայի համանուն գյուղի՝ Կոսկենկորվայի: Այնտեղ է գտնվում նաև օղու արտադրությունը՝ Rajamaki գործարանը։ Գործարանի շրջակայքում գտնվող գրեթե մեկուկես հազար հեկտարը դարձել է պահպանվող տարածք, որտեղ բնությունը պահպանվում է իր սկզբնական տեսքով։ Արդեն առաջին 10 տարիներին Կոսկենկորվան դարձել է Սուոմիի տարածաշրջանի ամենահայտնի ալկոհոլային խմիչքը:

Գործարանը սկսել է օղի արտադրել 1953 թվականին և հենց սկզբից հիմնվել է ամենաբարձր որակի բնական հումքի վրա։ Արտադրողը սկզբում ստեղծել է խմիչք, որը կարելի է խմել անգամ տաք, նաև սառեցված, ինչպես նաև կոկտեյլների կազմում: Այսօր արտադրողը նշում է, որ մեկ լիտր ըմպելիք արտադրելու համար անհրաժեշտ է մոտավորապես 36500 հատիկ Բոտնիա տեսակի գարի: Մի քանի խոսք այդ գարու մասին: Ֆինները հպարտ են, որ գարու այդ տեսակը միացել է Շպիցբերգեն կղզում գտնվող համաշխարհային սերմերի պահոցում: Այդ ստորգետնյա պահեստարանը, որը գտնվում է Հյուսիսային բևեռից 1300 կմ հեռավորության վրա, ժամանակակից Նոյան տապանն է։ Նրա հիմնական նպատակն է պահպանել ամենակարևոր սերմերի տեսակները համաշխարհային աղետի դեպքում։ Այսպիսով, աղետի դեպքում Կոսկենկորվա  օղու գաղտնիքը չի կորչի։

Ներկայումս այդ օղու մի քանի տեսակներ են արտադրվում։ Ի հավելումն դասական 40 %-ոց օղու, շարքը ներառում է մի շարք բուրավետ օղիներ 38% ալկոհոլի պարունակությամբ: Օղին արտադրվում է հապալասի, կանաչ խնձորի, լինգոնի, վայրի հատապտուղների և վանիլի բույրերով։ Դասական օղին ունի մեղմ համ և հեշտ է խմել ցանկացած ձևով:

Բազմաթիվ միջազգային մրցանակներով պարգևատրված Koskenkorva օղին այնուամենայնիվ դեռևս բավականին ավելի քիչ է հայտնի, քան  ավանդաբար ավելի հայտնի Finlandia օղին:

Կ. Խաչիկյան