Առողջության համընդհանուր ապահովագրության համակարգի շահառուների թիվը կավելանա, նախատեսվում է վարչական նոր պատասխանատվություն. «Փաստ»

«Փաստ» օրաթերթը գրում է.

Առողջապահության նախարարությունն առաջարկում է փոփոխություններ և լրացումներ կատարել «Առողջության համընդհանուր ապահովագրության մասին», «Բնակչության բժշկական օգնության և սպասարկման մասին» օրենքներում և Վարչական իրավախախտումների վերաբերյալ օրենսգրքում։

Ի մասնավորի, առաջարկվում է առողջության համընդհանուր ապահովագրության մեջ ընդգրկված բնակչության խմբերում որպես ապահովագրման ենթակա պարտադիր խումբ և, ըստ այդմ, առողջության համընդհանուր ապահովագրության ենթակա խմբերի մեջ ներառել մինչև մեկ տարեկան երեխաներին, էլեկտրոնային հարթակով իրականացվող ուղևորափոխադրման ծառայության փոխադրողներին (վարորդներ) (ուժի մեջ մտնելու ժամկետ՝ 2027 թվականի հունվարի 1), ինչպես նաև «Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» օրենքի իմաստով և կարգով շահառու ճանաչված անձանց, որոնց մի մասը «Առողջության համընդհանուր ապահովագրության մասին» օրենքում տեղ գտած ձևակերպման պատճառով ներառված չէր առողջության համընդհանուր ապահովագրության համակարգում։

Առողջության համընդհանուր ապահովագրության (ԱՀԱ) համակարգով ապահովագրված անձանց հետ փոխկապակցված անձանց մասով օրենքի ուժի մեջ մտնելու ժամկետը կսահմանվի 2027 թվականի հունվարի 1-ը։ Միևնույն ժամանակ, անհատ ձեռնարկատերերի համար ԱՀԱ համակարգի համար նախատեսված ապահովագրավճարների պատշաճ ապահովման նպատակով առաջարկվում է 2026 թվականի համար վճարման վերջնաժամկետ սահմանել 2026 թվականի հուլիսի 20-ը:

«Առողջության համընդհանուր ապահովագրության մասին» օրենքի 25-րդ հոդվածում, ի թիվս այլ փոփոխությունների, առաջարկվում է առողջության համընդհանուր ապահովագրության, ինչպես նաև բժշկական օգնության և սպասարկման նվազագույն ծավալի կամ լրացուցիչ ծառայությունների տրամադրման ոլորտներում գաղտնի տեղեկությունների ցանկից հանել առևտրային գաղտնիք պարունակող տեղեկությունների մասին հիշատակումները, հաշվի առնելով, որ ԱՀԱ համակարգում նման տեղեկություններ չեն հավաքագրվում։

Վարչական իրավախախտումների վերաբերյալ օրենսգրքի մասով առաջարկվում է բժշկական օգնություն և սպասարկում իրականացնող իրավաբանական անձանց և անհատ ձեռնարկատերերի կողմից օրենքով սահմանված կարգով կնքված պայմանագրի առկայության դեպքում բժշկական օգնության և սպասարկման համար նվազագույն ծավալի կամ լրացուցիչ ծառայությունների համար օրենքով չնախատեսված վճարների գանձման կամ այդ ծառայությունների տրամադրումը մերժելու համար սահմանել վարչական պատասխանատվություն։

Մանրամասները՝ «Փաստ» օրաթերթի այսօրվա համարում