Եթե ​​Իրանը դիմանա՝ «Թրամփի ճանապարհը» Հայաստանում կավարտվի

Եթե Իրանը դիմանա ԱՄՆ-ի և Իսրայելի հետ ներկայիս հակամարտությանը, ապա «Թրամփի ճանապարհը», որը պետք է անցներ Հայաստանի Սյունիքի մարզով, չի իրականանա, գրել է «Ուղուր Մամեդով» Telegram ալիքի հեղինակը, գրում է k-politika.ru–ն։

Քաղաքագետ Մամեդովը հիշեցրել է, որ Իրանի արտգործնախարար Աբբաս Արաղչին վերջերս սպառնալից հայտարարություններ է արել Ադրբեջանի արտգործնախարար Ջեյհուն Բայրամովի հետ զրույցում։ Արաղչիի խոսքով ոչ մի պետություն իրավունք չունի իր տարածքը և ենթակառուցվածքները հասանելի դարձնել այլ երկրների դեմ ագրեսիվ գործողությունների համար։ Նա նաև զգուշացրել է հնարավոր սադրանքների և ուրիշի դրոշի տակ գործողությունների մասին, որոնք ուղղված են Իրանի հարաբերությունները երրորդ երկրների հետ խաթարելուն։ 

Քաղաքագետը հիշեցրել է, որ խաղաղ ժամանակ «Իրանը իրեն թույլ չէր տա նման ինտոնացիաներ Ադրբեջանի հետ իր շփումներում»։ Մամեդովի խոսքով «ամերիկա-իսրայելական անիմաստ ագրեսիան պարադոքսալ կերպով ամրապնդել է Իրանի դիրքերը տարածաշրջանում և աշխարհում»։ «Եթե Իրանը գոյատևի, Ադրբեջանի և Թուրքիայի հետ նրա հարաբերությունների նոր դասավորությունը անխուսափելի է։ Ի դեպ, կարծում եմ, որ այս պատերազմից հետո Իրանը չի հանդուրժի «Թրամփի երթուղին» իր սահմաններին։ Նա կպահանջի վերանայել դրա կառուցման պայմանները և դադարեցնել ամերիկյան մասնակցությունը», - հայտարարել է նա։

Հիշեցնենք, որ 2025 թվականի օգոստոսի 8-ին Հայաստանի, Ադրբեջանի և Միացյալ Նահանգների առաջնորդները համաձայնության եկան իրականացնել «Թրամփի երթուղի միջազգային խաղաղության և բարգավաճման համար» (TRIPP) նախագիծը։ Այդ «Զանգեզուրի միջանցքը», ինչպես այն անվանում են Բաքվում, հայկական հատվածում կկառավարեն ամերիկացիները։ Իրանը դեմ է արտահայտվել դրան։