Կփոխվի արդյոք 10 հազարանոց թղթադրամի դիզայնը. ԿԲ նախագահի մեկնաբանությունը

Ընդունում եմ, որ 1000 և 10 000 դրամանոցները նման են, մենք մտածել ենք դրա մասին, բայց թղթադրամ փոխելու դեպքում մեծ ծախսեր են լինելու։ Այս մասին, այսօր՝ մարտի 17–ին, մամուլի ասուլիսում հայտարարեց ՀԿ նախագահ Մարտին Գալստյանը՝ պատասխանելով հարցին, թե արդյոք մտադիր չեն փոխել այդ թղթադրամներից գոնե մեը, քանի որ մարդիկ հաճախ շփոթում են հազարանոցը 10–հազարանոցի հետ։

«Մենք, եթե չեմ սխալվում 10 000 դրամանոցի վրայի «10000» գրվածը փոխեցինք, որ ինքը ավելի ակներև լինի։ Կան նաև այլ արգումենտներ, որ ասում են՝ դոլարները բոլորը նույն գույնի, նույն ձևի, նույն չափի են, բայց մարդիկ ուշադիր են ու ոչ մի խնդիր չի լինում, 10 դոլարը 20 դոլարանոցի հետ ոչ մեկը չի խառնում։

Ես ընդունում եմ, որ կա ինչ-որ գունային գամայի նմանություն, բայց ամեն դեպքում, եթե ուշադիր լինեն, պիտի որ խնդիր չլինի»,–ասաց նա։

Հարցին՝ ինչքան ժամանակը մեկ են փոխվում թղթադրամները, ԿԲ նախագահը պատասխանեց. «Եթե ես չեմ սխալվում, մեր նոր սերնդի թղթադրամների համար մենք 3-5 տարվա կյանք ենք ունենում, որովհետև իրենք կոմպոզիտային են, իրենք մենակ թղթից չեն, պլաստիկի էլեմենտներ ունեն իրենց մեջ, որը թույլ է տալիս մեզ, որպեսզի իրենց մաշվածությունը նվազի։ Այսինքն մենք գնացել էինք այն ճանապարհով, որ ծախսերը նվազեցնենք։

Ինչ որ բաներ կան, որ փոխվում է բայց ամբողջությամբ սերիան փոխել այդքան ճիշտ չի լինի այս պահին, դա քննարկելու հարց է»։