Եվրոպայի ճանապարհը սկսվում է Երևանից. Թաթոյանը ներկայացրեց «4 գիծը», որոնք Հայաստանը պետք է պահի նախ իր համար
ՔԱՂԱՔԱԿԱՆՈՒԹՅՈՒՆ
Հայաստանի եվրոպական ուղու շուրջ քննարկումները նոր թափ ստացան վարչապետ Նիկոլ Փաշինյանի՝ Եվրոպական կառույցում ունեցած ելույթից հետո։ Այս համատեքստում «Միասնության թևեր» քաղաքական նախաձեռնության ղեկավար Արման Թաթոյանը հանդես է եկել գնահատականներով՝ ներկայացնելով այն սկզբունքները, որոնք, ըստ նրա, պետք է դառնան Հայաստանի եվրոպական ուղղության իրական հիմքը։
Թաթոյանի համոզմամբ՝ Եվրոպայի հետ ինտեգրումը կարող է լինել արդյունավետ միայն այն դեպքում, երբ այն կառուցվում է ինքնահարգանքի և պետական արժանապատվության դիրքերից։ Նա ընդգծել է, որ ցանկացած ուժեղ միություն ընդունում է ոչ թե խնդրողներին, այլ այն պետություններին, որոնք կարողանում են պաշտպանել իրենց շահերը և հարգել սեփական քաղաքացիներին։
«Հայաստանի ճանապարհը դեպի Եվրոպա ճիշտ ճանապարհ է, սակայն կա մի կարևոր սկզբունք, որը պետք է հասկանալ հենց սկզբից։ Եվրոպայում չեն ընդունում այն երկրներին, որոնք գալիս են խնդրողի դիրքերից։ Այնտեղ ընդունում են այն պետություններին, որոնք հարգում են իրենց և իրենց քաղաքացիներին»,– նշել է նա։
Այս տրամաբանությամբ Թաթոյանը ներկայացրել է չորս սկզբունք, որոնք, ըստ նրա, պետք է դառնան Հայաստանի պետական քաղաքականության առանցքը՝ անկախ արտաքին ուղղությունից։
Առաջին սկզբունքը վերաբերում է Հայաստանի տարածքային ամբողջականությանը։ Նրա խոսքով՝ Հայաստանի միջազգային ճանաչված սահմանները պետք է մնան անձեռնմխելի։ Քանի դեռ Հայաստանի ինքնիշխան տարածքում գտնվում են օտար զինված ուժեր, որևէ լուրջ ինտեգրացիոն գործընթաց չի կարող լինել լիարժեք։
Երկրորդ սկզբունքը վերաբերում է Արցախի հայերի իրավունքներին։ Թաթոյանը նշել է, որ հարյուր հազարից ավելի հայեր դարձել են բռնի տեղահանվածներ, և ցանկացած խաղաղության համաձայնագիր, որը չի ներառում նրանց վերադարձի իրավունքի իրագործման և արդար փոխհատուցման մեխանիզմներ, չի կարող ամբողջական համարվել։ Նրա խոսքով՝ կայուն խաղաղությունը չի կարող կառուցվել մարդկանց ճակատագիրը անտեսելու հաշվին։
Երրորդ սկզբունքը վերաբերում է երկրի ներսում ժողովրդավարությանը և իրավունքների պաշտպանությանը։ Թաթոյանի գնահատմամբ՝ եվրոպական ճանապարհը անհամատեղելի է քաղաքական հետապնդումների, եկեղեցու նկատմամբ ճնշումների և իշխանության կենտրոնացման հետ։ Նա ընդգծել է, որ եվրոպական արժեքների հիմքում խոսքի ազատությունն է, դատարանների անկախությունը, փոքրամասնությունների իրավունքների պաշտպանությունը և կրոնական հաստատությունների ազատ գործունեությունը։
Չորրորդ սկզբունքը վերաբերում է միջազգային պարտավորությունների պահպանմանը։ Նրա համոզմամբ՝ Հայաստանը պետք է լինի պետություն, որը պահում է իր խոսքը և լիարժեք կատարում է իր ստորագրած համաձայնագրերը այնքան ժամանակ, քանի դեռ դրանք գործում են և գործընկերները նույնպես կատարում են իրենց պարտավորությունները։
Թաթոյանը ընդգծել է, որ ներկայացված սկզբունքները ուղղված չեն որևէ գործընթաց խոչընդոտելուն։ Ընդհակառակը՝ դրանք պայմաններ են, որոնց դեպքում հնարավոր է կառուցել կայուն խաղաղություն և իրական ինտեգրում։ Նրա խոսքով՝ այն խաղաղությունը, որը կառուցվում է միայն զիջումների վրա և չի ապահովվում երաշխիքներով, երկարաժամկետ չի կարող լինել կայուն։
Քաղաքական գործիչը նաև ընդգծել է, որ եվրոպական ինտեգրումը չի կարող դիտվել միայն արտաքին քաղաքական ընտրություն։ Նրա խոսքով՝ այդ ճանապարհը սկսվում է երկրի ներսից՝ պետական ինստիտուտների կայացումից, քաղաքացիների իրավունքների պաշտպանությունից և պետականության նկատմամբ հարգանքից։
Այս համատեքստում նա ամփոփել է իր գնահատականը մի կարևոր ձևակերպմամբ․ Հայաստանի ճանապարհը դեպի Եվրոպա սկսվում է ոչ թե եվրոպական մայրաքաղաքներից, այլ հենց Երևանից։
