Կեղծ հարցումներով փորձում են մոլորեցնել հանրությանը

Մինչ գործող իշխանությունները համոզում են ամերիկյան Միջազգային հանրապետական ինստիտուտին չհրապարակել իր հարցման արդյունքները, որոնց տվյալներով փաշինյանական իշխանությունը բավականին ծանր վիճակում է, իշխանություններն իրենք են նախաձեռնում և հրապարակում կեղծ հարցումների տվյալներ, իբր իրենց ունեցած բարձր վարկանիշի մասին։

Առաջիկայում նման դրսևորումներն ավելի ու ավելի են շատանալու, իսկ տարբեր, հատկապես Արևմուտքից սնվող կառույցներ էլ փորձելու են կեղծ հարցումների տվյալներ ներկայացնել՝ հանրության մեջ տպավորություններն աղավաղելու, ինչպես նաև շարքային ընտրողին համոզելու, որ ամեն ինչ կանխորոշված է և չարժե գնալ ընտրությունների։

Այսպես կոչված, «Հայաստանի ընտրական համակարգի ուսումնասիրության կենտրոնը» (ArmES), մի հարցում է հրապարակել, որտեղ փաշինյանական կուսակցությունը գերազանցում է ընդդիմադիրներին։ Ըստ այդ հարցումների՝ «Քաղաքացիական պայմանագիրը» կստանար 26․1 տոկոս քվե, եթե ընտրությունները կայանային վաղը։ 2-րդ տեղում «Ուժեղ Հայաստան»-ն է՝ 11․9 տոկոսով, 3-րդ-ը՝ Բարգավաճ Հայաստանը՝ 6․2 տոկոսով։ Ըստ այս հարցման՝ մյուս քաղաքական ուժերը խորհրդարան չեն անցնում։ 3.35 տոկոս ստացել է «Հայաստան» դաշինքը, 2.54 տոկոս՝ «Միասնության թևերը», 2.14 տոկոս՝ «Հանրապետություն» կուսակցությունը։ Հարցվածների 17,8 տոկոսը հրաժարվել է պատասխանել, 18,8 տոկոսն էլ չգիտի, թե ում է ընտրելու։

Առաջին հայացքից այս հարցումը բավական պրոֆեսիոնալ ձևով է կազմված, որպեսզի հնարավորինս վստահելի թվա հանրության համար, բայց առնվազն վերջին մի քանի տարվա ընթացքում անցկացված բոլոր հարցումները, այդ թվում նույն Միջազգային հանրապետական ինստիտուտի՝ հուլիսին հրապարակած հարցումները վկայում են, որ քաղաքացիական պայմանագիրը չունի 15-16 տոկոսից բարձր վարկանիշ, իսկ մամուլում տարածվող տեղեկությունները վերջին բոլոր հարցումների վերաբերյալ վկայում են, որ փաշինյանական իշխանությունը ընդհանրապես լուրջ հետընթաց է արձան արձանագրել, և ընդդիմադիր հիմնական ուժերը շատ քիչ են զիջում գործող իշխանություններին։

Իրական հարցումների հրապարակումը կարող է ծանր հետևանքներ ունենալ Փաշինյանի և իր թիմի համար, ուստի և առաջիկայում իշխանություններն ամեն ինչ անելու են հանրությանը համոզելու իրենց բարձր վարկանիշի մեջ։ Սա արվում է ընդամենը մեկ նպատակով, որպեսզի մասնակցության թիվը խորհրդարանական ընտրություններին հնարավորինս քիչ լինի։ Միայն այդ կերպ «Քաղաքացիական պայմանագրին» կհաջողվի կրկին վերարտադրվել։ 

Աննա Մարգարյան