Netflix-ը չի կարողացել Paramount-ին գերազանցող առաջարկ ներկայացնել «Warner Bros.»-ի համար

Netflix-ի գործադիր տնօրեններ Թեդ Սարանդոսը և Գրեգ Փիթերսը հայտարարել են, որ հոսքային ծառայությունը հրաժարվել է «Warner Bros. Discovery»-ն (WBD) ձեռք բերելու գործարքից՝ «Paramount Skydance Corporation»-ի (PSKY) նոր առաջարկի պատճառով։

Ավելի վաղ WBD-ն «Paramount Skydance»-ի նոր միաձուլման առաջարկը համարել է Netflix-ի առաջարկը գերազանցող։

Ըստ ընկերության՝ «Paramount Skydance»-ի վերջին առաջարկին համապատասխանելու համար պահանջվող գնով գործարքն այլևս ֆինանսապես գրավիչ չէ։ «Ուստի մենք հրաժարվում ենք մեր առաջարկը բարձրացնել «Paramount Skydance»-ի մակարդակին»։

Ծառայության ղեկավարները ընդգծել են, որ իրենք «կլինեն Warner Bros.-ի պաշտամունքային ապրանքանիշերի ուժեղ կառավարիչներ», և որ գործարքը կամրապնդի ԱՄՆ-ում զվարճանքի արդյունաբերությունը։ «Այնուամենայնիվ, այս գործարքը միշտ ողջունելի լրացում էր ճիշտ գնով, ոչ թե անհրաժեշտ ձեռքբերում որևէ հանգամանքներում», - ընդգծել են նրանք։

Paramount-ը պատրաստ է ամբողջությամբ գնել «Warner Bros. Discovery»-ն (ամբողջ ընկերության համար ավելի քան 108 միլիարդ դոլար), մինչդեռ Netflix-ը՝ միայն «Warner Bros.» կինոստուդիան, «HBO Max» հոսքային ծառայությունը և HBO հեռուստաալիքը՝ 82.7 միլիարդ դոլարով կամ մեկ բաժնետոմսի համար 27.75 դոլար կանխիկով։

Դեկտեմբերին հայտարարվել էր, որ Netflix-ը Warner Bros. Discovery-ից ձեռք կբերի Warner Bros. կինոստուդիան, HBO Max հոսքային ծառայությունը և HBO հեռուստաալիքը։ Ընկերությունները հայտարարեցին գործարքի մասին։