Թոշակառուների հանդեպ նախընտրական «բարիացում»՝ բազմամիլիոնանոց պարգևավճարների ֆոնին. «Փաստ»

«Փաստ» օրաթերթը գրում է.

Այն, որ ընտրությունների նախաշեմին Փաշինյանն ու ՔՊ-ն ամեն կերպ ու հատկապես՝ պետական բյուջեի ու միջոցների հաշվին փորձելու են սիրաշահել ընտրողներին, պարզից էլ պարզ էր: ՔՊ-ի ու Փաշինյանի նախընտրական «բարիանալը» նախ՝ ձևական է, երկրորդ՝ ոչ մի բարի բան չի խոստանում հեռանկարում:

Կարճ ասած՝ Նիկոլ Փաշինյանը երեկ հիշեց կենսաթոշակառուների ու նրանց ցածր կենսաթոշակների մասին: Ու չնայած մի երկու ամիս առաջ երդվում էին, որ եթե մի 5000 դրամով թոշակները բարձրացնեն, ապա երկրի տնտեսությունը կփլուզվի, հիմա հանկարծակի որոշեցին, որ թոշակները ապրիլի 1-ից կբարձրանան:

«Ապրիլի 1-ից կենսաթոշակները կավելանան։ Ընդ որոշում, համեմատաբար ցածր թոշակները կավելանան 10 հազար դրամով, համեմատաբար բարձր թոշակները՝ ավելի շատ»,-հայտարարել է Փաշինյանը:

Այո, այն նույն Փաշինյանը, որ ցինիզմի «մաստեր կլաս» ցուցադրելով՝ մի երկու ամիս առաջ հայտարարում էր, թե թոշակառուները չգիտեն, չեն հասկանում, թե ինչի վրա ծախսեն 10000 դրամը: Հետո ասում էր, որ եթե նույնիսկ 20 հազար դրամ բարձրացնեն, թոշակառուի կյանքում բան չի փոխվելու: Ասում էր ու պետական պաշտոնյաներին, այդ թվում՝ իրեն բազմամիլիոնանոց պարգևավճարներ հատկացնելու որոշումներ ընդունում: Դե, հասկանալի է, իրենք գիտեն՝ ինչպես ծախսել, իրենց կյանքում պետք է բան փոխվի ու փոխվել է (շարունակում է փոխվել)՝ օրավուր հարստանալու տեսքով:

Ավելին, երբ ընդդիմադիր ուժերը մատնացույց էին անում, որ հնարավոր է բարձրացնել կենսաթոշակները, քպականներով հարձակվում էին, թե անհնար է: Ու հիմա, բազմամիլիոնանոց (ու չվաստակած) պարգևավճարները ծախսելուց հետո, ընտրություններից մի երեք ամիս առաջ «հանկարծ» հիշեցին թոշակառուների մասին:

Հանրային առաջին արձագանքն անողոք էր. շատ-շատերը սա բնորոշեցին որպես բացահայտ ընտրակաշառք: Չէ, թոշակ բարձրացնելը լավ բան է, անհրաժեշտ բան է, կարևոր բան է, բայց երբ 8 տարի գրեթե թոշակ չես բարձրացրել (մաքսիմում՝ 3000 դրամ, երբ գնաճն աննախադեպ չափերի է հասել), ու մեկ էլ՝ հոպ, ընտրությունների շեմին այսքան «առատաձեռն» ես դառնում, հասկանալի է դառնում, որ նախ՝ Նիկոլ Փաշինյանն ինքն էլ հրաշալի գիտի, թե ինչ շրիշակային վարկանիշ ունի ներկայում, երկրորդ՝ հասկանում է, որ թոշակառուներին վիրավորել է վերոնշյալ ձևակերպումներով: Եվ, ուրեմն, ընտրություններից մի 100 օր առաջ պետք է հայտարարել կենսաթոշակների և ծերության նպաստների բարձրացման մասին:

Մյուս կողմից՝ հանրահայտ է, որ նման քայլը, ինչպիսին է թոշակների բարձրացումը, պլանավորվում է նախապես, առանձին տողով նշվում է տարեկան բյուջեի մեջ: Մինչդեռ, այս տարվա բյուջեում նման բան նախատեսված չէ: Հենց իրենք՝ Փաշինյանն ու ՔՊ-ն էին աղմկում, թե դա անհնար է, թե ոչ մի կերպ թոշակ բարձրացնելու տեղ չունեն, որ ովքեր դրա մասին խոսում են... պոպուլիստներ են, այս, այն:

Ու պատահական չէ, որ մասնագետներն արդեն հարց են բարձրացնում՝ արդեն հաստատված բյուջեում այդքան գումարը (մոտ 60 մլրդ դրամ) որտեղի՞ց եք հայթայթելու, ո՞ւմ հաշվին: Էլի՞ հարկեր, տույժ ու տուգանքներ եք բարձրացնելու ու հանրության կաշին քերթեք: Թե՞ այդ գումարը կար, բայց պահում էիք ընտրությունների համար......

Հ.Գ.-Ի դեպ, երեկ ոմանք կես կատակ-կես լուրջ հիշեցնում էին, որ ապրիլի մեկը, բացի Ծիծաղի միջազգային օր լինելուց, ժողովրդի մեջ տարածված է նաև որպես խաբելու օր: Բայց սա արդեն «հին ինֆորմացիա» է, քանի որ արդեն 8 տարի է՝ Հայաստանի իշխանությունների համար ամեն օր է խաբելու օր...

Մանրամասները՝ «Փաստ» օրաթերթի այսօրվա համարում