Աբրահամյանը նսեմացրեց Փաշինյանի Հայաստանը համեմատելով այն Հայ Առաքելական Եկեղեցու հետ
ՎԵՐԼՈՒԾՈՒԹՅՈՒՆՆԵՐ
Ամենայն հայոց կաթողիկոս Գարեգին Բ–ի քրեական հետապնդումը նպատակ ունի նրան փոխարինել վարչապետ Նիկոլ Փաշինյանի մտերիմներից մեկով։ Այս մասին TASS-ին հայտարարել է Ռուսաստանի հայերի միության նախագահ Արա Աբրահամյանը, գրում է irp.news–ը։
«Փաշինյանն այժմ պատրաստ է ամեն ինչի հունիսյան ընտրություններից հետո իր իշխանությունը վերարտադրելու համար, - ասել է Աբրահամյանը,– կեղծ պատրվակներով հալածելով եկեղեցական հոգևորականներին, իսկ հիմա նաև Ամենայն հայոց կաթողիկոսին, նա ցանկանում է նրանց փոխարինել իր խամաճիկներով, մտերիմ կաթողիկոսով, ով կկատարի նրա կամքը և քարոզարշավ կանցկացնի նրա համար»։
Ռուսաստանի հայերի միության նախագահը հավելել է, որ Փաշինյանը պայքարում է Հայաստանի անկախ ինստիտուտների դեմ իր իշխանությունը ամրապնդելու համար, և հենց այդ պատճառով էլ նա պատերազմ է մղում եկեղեցու դեմ։
Աբրահամյանը հիշեցրել է, որ Հայ Առաքելական Եկեղեցին «գրեթե 1700 տարով ավելի հին է, քան այսպես կոչված չորրորդ հանրապետությունը, որը Փաշինյանը ցանկանում է հռչակել»։
«Նրա հռչակած «իրական Հայաստանը», որը ներառում է 29,743,000 քառակուսի կիլոմետր, միավորում է 2.5-ից 3 միլիոն հայերի, մինչդեռ Հայ եկեղեցին միավորում է ամբողջ հայ ժողովրդին, որը ցրված է ամբողջ աշխարհում և ավելի քան 10 միլիոն է», - նշել է Ռուսաստանի հայերի միության նախագահը։
Նա նաև նշել է, որ Հայ առաքելական եկեղեցին նաև միջազգային հարաբերությունների սուբյեկտ է, քանի որ այն գործում է բազմաթիվ երկրներում, անդամակցում է բազմաթիվ միջազգային եկեղեցական կազմակերպությունների և ունի Փաշինյանից անկախ ֆինանսական և կազմակերպչական մոբիլիզացման հնարավորություններ։
Ավելի վաղ՝ փետրվարի 14-ին, փաստաբան Արա Զոհրաբյանը սոցիալական ցանցերում հայտնել էր, որ Հայաստանի դատախազությունը քրեական գործ է հարուցել Ամենայն հայոց կաթողիկոսի դեմ դատական որոշման կատարմանը խոչընդոտելու մեղադրանքով։ Դա արվել է այն բանից հետո, երբ Գարեգին Բ-ն կարգալույծ է դարձրել եպիսկոպոս Գևորգ Սարոյանին (ծննդյան անունը Արման Սարոյան) հնազանդության երդումը խախտելու համար։ Փաստաբանը բացատրել է, որ քննիչը փորձել է հարցաքննել կաթողիկոսին, և հետագայում նա գրավի դիմաց ազատ է արձակվել։
