Ռուսաստանը հայտարարել է օկուպացված Աբխազիայի միջոցով Վրաստանի հետ երկաթուղային կապի վերականգնման ծրագրերի մասին

Ռուսաստանը քննարկում է օկուպացված Աբխազիայի միջոցով Վրաստանի հետ երկաթուղային կապի վերականգնման հարցը, գրում է newsgeorgia.ge–ն: Այդ մասին վերջերս հայտարարել է Ռուսաստանի փոխվարչապետ Ալեքսեյ Օվերչուկը: «Աշխատանքներ են տարվում Կովկասում բոլոր խափանված երթուղիները ապաշրջափակելու ուղղությամբ: Դա ներառում է նաև Ռուսաստանի Դաշնության և Վրաստանի միջև Աբխազիայի միջոցով երկաթուղային կապի վերականգնման հնարավորությունը», - ասել է նա:  Օվերչուկի խոսքով տրանսպորտային և լոգիստիկ կապը ամրապնդելու համար Մոսկվան «հույս ունի տարածաշրջանի բոլոր պետությունների միջև կառուցողական համագործակցության վրա»: Նա չի մանրամասնել, թե արդյո՞ք Թբիլիսին տեղեկացված է այդ ծրագրերի մասին:

Ռուսաստանի և Վրաստանի միջև Աբխազիայի միջոցով երկաթուղի գոյություն ուներ դեռևս խորհրդային ժամանակաշրջանում. այն Սոչին և Թբիլիսին կապում էր Սուխումիի և Փոթիի միջոցով: 1990-ականների սկզբին Աբխազիայում տեղի ունեցած պատերազմից հետո ուղևորափոխադրումները և բեռնափոխադրումները դադարեցվել են: Ներկայումս ճանապարհը գտնվում է խարխուլ վիճակում:

Վերջին տարիներին ռուս պաշտոնյաները մի քանի անգամ հայտարարել են այդ գիծը վերակառուցելու ծրագրերի մասին: Մամուլում հայտնվել են հաղորդագրություններ, որ «Վրացական երազանքի» կառավարությունը գաղտնի բանակցություններ է վարում Մոսկվայի հետ այդ հարցի շուրջ, սակայն վարչապետ Իրակլի Կոբախիձեն հերքել է դա։ Միևնույն ժամանակ, Թբիլիսին է բազմիցս հայտարարել, որ օկուպացված տարածքներով անցնող ցանկացած տրանսպորտային նախագիծ կարող է դիտարկվել միայն Վրաստանի տարածքային ամբողջականության վերականգնման համատեքստում։

Նյութը հրապարակման պատրաստեց Կամո Խաչիկյանը

www.1or.am