«Ինտերը» դրամատիկ պայքարում հաղթեց «Յուվենտուսին»
ՍՊՈՐՏ
Իտալական Ա Սերիայի 25-րդ տուրի կենտրոնական խաղում առաջատար «Ինտերը» սեփական հարկի տակ ընդունել էր Թուրինի «Յուվենտուսին»։ «Ջուզեպպե Մեացցայում» կայացած գոլառատ ու լարված հանդիպումն ավարտվեց տանտերերի հաղթանակով՝ 3:2 հաշվով:
Հանդիպման հաշիվը բացվեց 17-րդ րոպեին, երբ Անդրեա Կամբիասոն գրավեց սեփական դարպասը: Ընդամենը 9 րոպե անց թուրինցիների պաշտպանն ուղղեց իր սխալը՝ վերականգնելով հաշվի հավասարությունը: Առաջին խաղակեսի վերջնամասում «Ծեր սինյորան» մնաց 10 հոգով. 42-րդ րոպեին երկրորդ դեղին քարտը ստանալով՝ դաշտից հեռացվեց Պիեռ Կալյուլուն:
Թվային առավելություն ստացած միլանյան ակումբը երկրորդ խաղակեսում մեծացրեց ճնշումը: 76-րդ րոպեին Ֆրանչեսկո Էսպոզիտոն առաջ մղեց «ներաձուրիներին», սակայն հյուրերը, չնայած փոքրամասնությանը, կարողացան պատասխան գոլ խփել. 83-րդ րոպեին աչքի ընկավ Մանուել Լոկատելին:
Հանդիպման ելքը վճռվեց հիմնական ժամանակի վերջին րոպեին: 90-րդ րոպեին Պյոտր Զելինսկու խփած գոլը կամային հաղթանակ պարգևեց «Ինտերին»:
Հայաստանի ազգային հավաքականի նախկին ավագ, «Ինտերի» կիսապաշտպան Հենրիխ Մխիթարյանը հայտավորված էր խաղին, սակայն մնաց պահեստայինների նստարանին և խաղադաշտ դուրս չեկավ։
Այս հաղթանակից հետո «Ինտերը» վաստակեց 61 միավոր և, տանելով 6-րդ անընդմեջ հաղթանակը, շարունակում է վստահորեն գլխավորել Ա Սերիայի մրցաշարային աղյուսակը: «Յուվենտուսը» 46 միավորով նահանջեց 5-րդ հորիզոնական:
