Հայաստանի մերձեցումը ԵՄ-ի հետ կազդի Ռուսաստանի հետ նրա դաշինքի վրա
ՔԱՂԱՔԱԿԱՆՈՒԹՅՈՒՆ
Եվրոպական միության հետ Հայաստանի արագացված մերձեցումը կարող է բացասաբար անդրադառնալ ինչպես Ռուսաստանի հետ նրա դաշինքի, այնպես էլ հետխորհրդային տարածքում ինտեգրացիոն գործընթացների վրա։ Այս մասին TASS-ին տված հարցազրույցում հայտարարել է Ռուսաստանի արտաքին գործերի նախարարության Եվրոպական խնդիրների վարչության տնօրեն Վլադիսլավ Մասլեննիկովը, գրում է mk.ru–ն։
Մեկնաբանելով Երևանի ԵՄ-ին միանալու ծրագրերը դիվանագետը նշել է, որ հաշվի առնելով ԵՄ-ի ռազմաքաղաքական դաշինքի վերածվելը և Ռուսաստանի հետ առճակատման ուղղությամբ նրա ընթացքը, այդ կառույցին անդամակցելու Հայաստանի հետաքրքրությունը լուրջ մտահոգության աղբյուր է։ Նա հավելել է, որ Մոսկվան հույս ունի, որ հայկական կողմը հասկանում է նման քայլի հնարավոր հետևանքները։
Մասլեննիկովը ընդգծել է, որ Հայաստանը Եվրասիական տնտեսական միության անդամ է, և Բրյուսելի հետ արագացված մերձեցումը կարող է խաթարել ինչպես երկկողմանի դաշնակցային հարաբերությունները, այնպես էլ եվրասիական ինտեգրացիայի զարգացումը որպես ամբողջություն։ Ռուսաստանի արտաքին գործերի նախարարությունը վերահաստատել է, որ Ռուսաստանը հարգում է պետությունների ինքնիշխան իրավունքը ինքնուրույն որոշելու ինտեգրացիոն միավորումներին իրենց մասնակցության ձևաչափը և տնտեսական զարգացմանը իրենց նվիրվածությունը, սակայն, ինչպես նշել է դիվանագետը, Հայաստանի ղեկավարությունը «հստակորեն ազդարարել է» ԵՄ-ի հետ մերձեցման մաքսիմալացման իր հետաքրքրության մասին։ Նա հիշեցրել է, որ 2025 թվականի ապրիլին ՀՀ նախագահ Վահագն Խաչատուրյանը ստորագրել է «ՀՀ-ի Եվրոպական Միությանը անդամակցության գործընթացի մեկնարկի մասին» օրենքը, որը նախկինում հաստատվել էր խորհրդարանի կողմից: Այս քաղաքականության շրջանակներում, ըստ Մասլեննիկովի, Բրյուսելն արդեն սկսել է Երևանին պարտադրել քաղաքական դրդապատճառներով անցում ԵՄ չափանիշներին, որը անտեսում է երկրի անդամակցությունը ԵԱՏՄ-ին և դրա հետ կապված պարտավորությունները:
Հիշեցնենք նաև, որ Ռուսաստանի արտաքին գործերի նախարարությունը հայտարարել է, որ Եվրասիական տնտեսական միությանը և Եվրամիությանը միաժամանակյա անդամակցությունը բնույթով անհնար է:
Նյութը հրապարակման պատրաստեց Կամո Խաչիկյանը
www.1or.am
