«Օրինակ արյուն». Զատուլինը բացատրել է, թե ի՞նչ կկորցնի ԱՊՀ-ն Մոլդովայի դուրս գալուց հետո

ԱՊՀ-ն ոչինչ չի կորցնի Մոլդովայի դուրս գալուց, սակայն երկրի բնակիչները կկորցնեն, քանի որ այդ կազմակերպությանը անդամակցությունը ենթադրում էր տարբեր օգտակար ծրագրեր և համաձայնագրեր, որոնք նախագահ Մայա Սանդուն այժմ կխզի, ասել է Պետդումայի ԱՊՀ հարցերով հանձնաժողովի փոխնախագահ Կոնստանտին Զատուլինը, գրում է eadaily.com–ը։

«Մոլդովայի ԱՊՀ-ից դուրս գալը ողջ պատմական անցյալի հետ կապերը խզելու և այլ աշխարհաքաղաքական իրականություն անցնելու ցանկություն է։ Սանդուն, ով պլանավորում է Մոլդովան հանձնել Ռումինիային, դա է հետապնդում։ Իհարկե, ԱՊՀ-ն նաև որոշակի ծրագրեր և համաձայնագրեր է մշակել։ Օրինակ արյան բանկ։ Այդ համաձայնագիրը կարևոր է այստեղ ապրող մարդկանց համար։ Եթե, օրինակ, Ուկրաինայում հիվանդի համար արյուն չկա, ապա այն կարող է տրամադրվել Ռուսաստանից կամ Բելառուսից։ Եվ հակառակը։ Նրանք, ովքեր նախկինում լքել էին ԱՊՀ-ն, օրինակ Վրաստանը, դուռը բաց են թողել խնդրելով տասնյակներով համաձայնագրեր շարունակել։ Եվ նմանատիպ բան կարող է տեղի ունենալ նաև հիմա։ Սակայն, քանի որ Մոլդովան ղեկավարում է բացարձակապես ոչ մի արգելակ չունեցող կին, նա կարող է խզել անգամ այդ կապերը։ Դա բարդանում է Ռուսաստանի և Եվրամիության միջև ընդհանուր առճակատմամբ, որին նա ձգտում է», - Զատուլինի խոսքերն է մեջբերել NSN-ը։

Զատուլինը որպես օրինակ բերել է նաև Հայաստանը, որը հասկանում է իր կախվածությունը ԱՊՀ-ից և Ռուսաստանից և գործում է «զգուշորեն»։ «Հայաստանը փորձում է ձևացնել, թե այս փուլում ԵՄ-ին միանալու իր ցանկությունը ոչ մի կերպ չի հակասում Եվրասիական միությանը իր անդամակցությանը։ Այո, Հայաստանն էլ ունի կառավարություն, որը երկերեսանի քաղաքականություն է վարում ԱՊՀ-ի և Եվրասիական միության նկատմամբ, բայց այն գործում է ավելի զգույշ հասկանալով Հայաստանի կախվածությունը ԱՊՀ-ից և Ռուսաստանի տնտեսություններից։ Մոլդովան չի ուզում հասկանալ դա։ Նրանք հույս ունեն, որ ամեն ինչի համար կվճարեն Ռումինիան և ԵՄ-ն», - նշել է պատգամավորը։

Զատուլինի խոսքով ԱՊՀ-ն ոչինչ չի կորցնի Մոլդովայի դուրս գալուց. այդ միությունը գոյություն կունենա այնքան ժամանակ, քանի դեռ Ռուսաստանը հետաքրքրված է դրա գոյությամբ։ «ԱՊՀ-ն կշարունակի գոյություն ունենալ այնքան ժամանակ, քանի դեռ Ռուսաստանը համաձայն է դրա գոյությանը։ Մենք, անշուշտ, հետաքրքրված չենք ԱՊՀ-ի փլուզմամբ, որովհետև դա կլինի մեր բնական ազդեցության ոլորտի փլուզում։ Կան փորձեր գտնել այլ խորշեր ինտեգրվելու համար։ Ուկրաինան նույնպես նման փորձ էր արել։ Հայաստանը նույնպես նման փորձ է անում։ Ինչ վերաբերում է Կենտրոնական Ասիայի պետություններին՝ այնտեղ պատկերն ավելի բարդ է, բայց կա նաև այլընտրանք։ Դա Թուրքական պետությունների կազմակերպությունն է, որը Թուրքիան խրախուսում և զարգացնում է։ Հետևաբար, սրանք բոլորը մրցակցային հարցեր են։ Եվ, իհարկե, մենք՝ որպես մրցակիցներ, եթե ուզում ենք հարգված լինել, պարտավոր ենք պայքարել այն բանի համար, ինչ ժառանգել ենք ԱՊՀ-ից։ Մեկ այլ հարց է այն, որ մենք չպետք է անտեսենք ԱՊՀ-ի ներսում առկա այլ այնպիսի միտումները, ինչպիսիք են ապառուսականացումը և ռուսաֆոբիայի աճը», - հայտարարել է նա։

Հիշեցնենք, որ Մոլդովան սկսել է ԱՊՀ-ի հետ կնքված հիմնական համաձայնագրերի չեղարկման գործընթացը, որոնք սահմանում են նրա կարգավիճակը կազմակերպությունում և թույլ են տալիս նրան դուրս գալ: Դրա մասին ավելի վաղ հայտարարել էր փոխվարչապետ և արտաքին գործերի նախարար Միհայ Պոպշոյը։ Նա ընդգծել էր, որ Մոլդովան չի լինի ԱՊՀ-ի պաշտոնական անդամ, և որ «նման գործընթաց արդեն իսկ սկսվել է»։