Տարօրինակ զարգացումներ Մասսյացոտնի թեմի շուրջ

Հայ առաքելական եկեղեցու Մասսյացոտնի թեմի շուրջ տարօրինակ և ապօրինի գործողությունները շարունակվում են։ Միայն մեկ քահանայի հետ կապված միջադեպն արդեն իսկ վկայում է փաշինյանական իշխանության՝ ամեն գնով ապօրինությունների գնալու ցանկության մասին։ Ոսկետափ համայնքի Սուրբ Սահակ-Մեսրոպ եկեղեցու հոգևոր հովիվ Տեր Արտաշես քահանա Հակոբյանը նախօրեին հայտարարել էր, թե միանում է իր առաջնորդի՝ Գևորգ եպիսկոպոս Սարոյանի և մյուս արքեպիսկոպոսների ու եպիսկոպոսների նախաձեռնած Հայ Առաքելական Սուրբ Եկեղեցու բարենորոգումների արդար պահանջին։ Հերքելով իր վրա հնարավոր ճնշումները՝ արդեն երեկ նույն քահանան մեկ այլ գրառում արեց։

«Խորապես ափսոսում և ցավ եմ ապրում իմ երեկվա հայտարարության համար, որը հետևանք էր արտաքին ազդեցությամբ մոլորության, իրականությունը ճիշտ չգնահատելու և հոգեկան լարվածության։ Այդ հայտարարությունը չի արտահայտում իմ իրական միտքն ու համոզումները»,– գրել էր քահանան՝ փաստացի, առանց այլևայլության, ակնարկելով, որ իր վրա արտաքին ճնշումներ են գործադրել։

Դատարանի որոշմամբ թեմի առաջնորդի պաշտոնում վերականգնված Գևորգ եպիսկոպոս Սարոյանը իշխանության աջակցությամբ շարունակում է հետապնդումները թեմի քահանաների նկատմամբ, ընդ որում՝ միացել են նաև տարբեր բարձրաստիճան պաշտոնյաներ, ԱԱԾ աշխատակիցներ, իրավապահներ, որոնք պարբերաբար այցելում են քահանաներին, ահաբեկում՝ պարտադրելով միանալ Գևորգ եպիսկոպոսին և հավատարմություն հայտնել նրան։

Իրավապահ համակարգը, իհարկե, ապօրինի ոչինչ այստեղ չի տեսնում, ընդհակառակը՝ իրենք էլ դարձել են փաշինյանական ապօրինությունները լեգիտիմացնող կառույց, բայց և Հայ առաքելական եկեղեցու դեմ այս ճնշումները վաղ թե ուշ պետք է հանգուցալուծվեն հենց Հայ առաքելական եկեղեցու և հավատավոր հոտի հաղթանակով, հակառակ պարագայում Փաշինյանը բարենորոգման անվան տակ վերջնականապես կարող է կործանել եկեղեցին։

Լուիզա Բադալյան