Հայաստանը և Միացյալ Նահանգները ստեղծում են TRIPP Development-ը՝ «Թրամփի երթուղին» իրականացնելու համար

Հայաստանը և Միացյալ Նահանգները համաձայնության են եկել ստեղծել TRIPP Development անվամբ համատեղ ձեռնարկություն, որը կիրականացնի «Թրամփի երթուղին միջազգային խաղաղության և բարգավաճման համար» (TRIPP) նախագիծը։

Պետդեպարտամենտի կողմից հրապարակված ճանապարհային քարտեզի համաձայն նախագիծը «կզարգանա Հայաստանի ներսում գտնվող որոշակի տարանցիկ երթուղիների շրջանակներում՝ ապագայում մանրամասն նկարագրվող վայրերում, միաժամանակ պահպանելով Հայաստանի լիակատար ինքնիշխանությունը նախագծի բոլոր տարածքների նկատմամբ»։

Հայ-ամերիկյան համատեղ ընկերությունը պատասխանատու կլինի Թրամփի երթուղու ենթակառուցվածքների զարգացման և իրականացման համար։ Համատեղ ձեռնարկությունը պատասխանատու կլինի ճանապարհային և երկաթուղային կառույցների, ինչպես նաև երթուղու երկայնքով անհրաժեշտ էներգետիկ և թվային ենթակառուցվածքների կառուցման և շահագործման համար։ Միացյալ Նահանգները կունենա 74% վերահսկիչ բաժնեմաս, իսկ Հայաստանը 26%։ Չնայած «Թրամփի երթուղին» զուտ երկկողմ հայ-ամերիկյան նախագիծ է, դրա հիմնական լոգիստիկ նպատակը Ադրբեջանին Նախիջևան անարգել ցամաքային մուտք ապահովելն է Հայաստանի միջոցով այնպես, ինչպես նշված է Վլադիմիր Պուտինի, Իլհամ Ալիևի և Նիկոլ Փաշինյանի կողմից ստորագրված 2020 թվականի նոյեմբերի 9-10-ի եռակողմ հայտարարության մեջ:

Բաքուն ուշադիր հետևում է այդ նախագծի իրականացմանը և հույս ունի գործնական աշխատանքների արագ մեկնարկի, vestikavkaza.ru–ի թղթակցին ասել է տնտեսագիտության դոկտոր, ՄԱԿ-ի տնտեսական գիտությունների ակադեմիայի միջազգային տնտեսագիտության ամբիոնի դոցենտ Էմին Ղարիբլին: «Բաքուն, իհարկե, կցանկանար տեսնել նախագծի իրականացման արագացումը, քանի որ Զանգեզուրի միջանցքի ադրբեջանական հատվածները՝ թե՛ Արևելյան Զանգեզուրում, թե՛ Նախիջևանում, շուտով լիովին կավարտվեն և պատրաստ կլինեն միանալու Հայաստանում Թրամփի երթուղուն: Մենք հույս ունենք, որ հայկական կողմից ամեն ինչ կընթանա նախապես համաձայնեցված ժամանակացույցի համաձայն, և այս տարի ճանապարհաշինության ուղղությամբ կոնկրետ քայլեր կձեռնարկվեն», - նշել է նա:

«Միացյալ Նահանգներն է զբաղեցնում նախագծի առյուծի բաժինը, և դա կապահովի Թրամփի երթուղու հաջող իրականացումը՝ շնորհիվ հուսալի ֆինանսավորման և ամերիկյան ընկերությունների կողմից այս ճանապարհի կառուցումից և շահագործումից առևտրային օգուտներ քաղելու հանձնառությամբ։ Ադրբեջանը մեծ հույսեր է կապում այս նախագծի հետ, հանրապետության համար կարևոր է ապահովել Նախիջևանի հետ անխոչընդոտ հաղորդակցություն, ինչպես որ մենք համաձայնության ենք եկել Հայաստանի հետ ավելի քան հինգ տարի առաջ։ Հետևաբար, Բաքուն կանի ամեն ինչ Թրամփի երթուղու իրականացումը հեշտացնելու համար», - ընդգծել է Էմին Գարիբլին։

«Ադրբեջանի համար երկու հիմնական չափանիշներն են, վերջնական արդյունքում Հայաստանի միջով անխոչընդոտ տեղաշարժը երկու ուղղություններով առանց վիզաների կամ մաքսային ստուգումների, բոլոր ադրբեջանական տրանսպորտային միջոցների համար՝ թե՛ բեռների, թե՛ ուղևորների, և երթևեկության անվտանգության ապահովումը չեզոք կողմից, այլ ոչ թե հայկական անվտանգության ուժերի կողմից։ Նախկինում անվտանգությունը պետք է ապահովեին ռուս սահմանապահները, իսկ Թրամփի երթուղու նախագծով ամերիկյան ընկերությունները։ Երկու չափանիշներն էլ սկզբնապես հաշվի են առնվել նախագծում, ուստի, ըստ էության, մնում է միայն ֆինանսավորման հատկացումը և ճանապարհի իրական կառուցումը», - նշել է տնտեսագետը։

Նյութը հրապարակման պատրաստեց Կամո Խաչիկյանը

www.1or.am