ԱՄՆ-ն սիրիական բանակից պահանջել է դադարեցնել առաջխաղացումը քրդերի հսկողության տակ գտնվող տարածքներում
ԱՄԵՆԱԸՆԹԵՐՑՎԱԾ
Միացյալ Նահանգները շաբաթ օրը կոչ է արել սիրիական բանակին դադարեցնել առաջխաղացումը երկրի հյուսիսում քրդերի վերահսկողության տակ գտնվող տարածքներում, որտեղ սիրիական զորքերը բախվել են քրդական ուժերի հետ Եփրատ գետի երկայնքով գտնվող ռազմավարական հենակետերի և նավթահանքերի համար, հայտնում է Reuters-ը:
Մի քանի օր շարունակ սիրիական զորքերը կենտրոնացել էին Եփրատի արևմտյան մասում գտնվող մի խումբ գյուղերի շուրջ և քրդերի գլխավորած «Սիրիական դեմոկրատական ուժերին» (SDF) կոչ էին անում վերատեղակայվել գետի հակառակ ափին:
SDF-ի մարտիկները շաբաթ վաղ առավոտյան հեռացել են այդ տարածքից՝ որպես բարի կամքի դրսևորում, սակայն հետո մեղադրել են սիրիական զորքերին համաձայնությունը խախտելու մեջ՝ շարունակելով առաջխաղացումը դեպի արևելք՝ գործարքի մեջ չներառված քաղաքներ և նավթահանքեր:
ԱՄՆ զինված ուժերի Կենտրոնական հրամանատարությունը գլխավորող Բրեդ Կուպերը հայտարարել է, որ սիրիական զորքերը պետք է «դադարեցնեն ցանկացած հարձակողական գործողություն» Հալեպ և Տաբկա քաղաքների միջև ընկած տարածքներում (շուրջ 160 կիլոմետր դեպի արևելք)։
Զորքերի դուրսբերման նախնական գործարքը ներառում էր Դեյր Հաֆեր քաղաքը և հարակից մի քանի գյուղեր, որոնց բնակիչները հիմնականում արաբներ են։ SDF-ը հեռացել է շաբաթ օրը, և սիրիական զորքերը համեմատաբար հանգիստ մուտք են գործել այնտեղ։
Սիրիական նավթային ընկերությունը հայտնել է, որ սիրիական զորքերը գրավել են մոտակա Ռասաֆա և Սուֆյան նավթահանքերը, որոնք այժմ կարող են վերագործարկվել: SDF-ի ուժերը նահանջել են դեպի արևելք՝ Տաբկա քաղաքի ուղղությամբ, որը լարվածության օջախ է. այն գտնվում է գետի հոսանքն ի վար՝ դեռևս արևմտյան ափին, և հիդրոէլեկտրակայանի պատնեշի մոտ է, որն էլեկտրաէներգիայի կարևորագույն աղբյուր է:
Սակայն երբ սիրիական բանակը հայտարարել է Տաբկան գրավելու մտադրության մասին, SDF-ը նշել է, որ դա նախնական գործարքի մաս չի կազմել, և իրենք պայքարելու են քաղաքն ու դրա շրջակայքի մեկ այլ նավթահանք պահելու համար:
Սիրիական բանակը հայտարարել է, որ քուրդ զինյալների հարձակումների հետևանքով իր չորս զինծառայող է սպանվել, իսկ SDF-ը հայտնել է իր մի քանի մարտիկների սպանության մասին՝ առանց հստակ թիվ նշելու:
