Էրդողանը և Թրամփը հեռախոսազրույցի ժամանակ կքննարկեն F-16 և F-35 կործանիչների մատակարարման հարցը

Ամերիկյան F-35 և F-16 կործանիչների գնման հարցը կդառնա Թուրքիայի նախագահ Ռեջեփ Թայիփ Էրդողանի և ԱՄՆ նախագահ Դոնալդ Թրամփի՝ երկուշաբթի օրը նախատեսված հեռախոսազրույցի առանցքային թեմաներից մեկը։ Այս մասին հայտնում է թուրքական կառավարամետ Hürriyet թերթը։

Պարբերականի տեղեկություններով՝ առաջնորդները կքննարկեն նաև CAATSA օրենքի շրջանակներում սահմանված պատժամիջոցների չեղարկումը, թուրքական զինված ուժերի կարիքների համար F-16 և F-35 ինքնաթիռների մատակարարումները, Halkbank բանկի գործը, ինչպես նաև քրդական SDF կազմավորումների՝ սիրիական բանակի կազմում ինտեգրման հարցը։

Ինչպես նշում է Hürriyet-ը, բանակցությունների առանձին թեմա կարող է դառնալ Գազայի հատվածում առկա իրավիճակը։

Ավելի վաղ Թրամփը հայտարարել էր, որ Վաշինգտոնն ուսումնասիրում է Թուրքիային F-35 կործանիչներ վաճառելու հնարավորությունը՝ միաժամանակ վստահություն հայտնելով, որ Անկարան չի օգտագործի այդ ինքնաթիռներն Իսրայելի դեմ։