Թբիլիսիի կենտրոնում Ամանորի նախօրեին սպանել են մի գործարարի. կասկածվում է Թուրքիայում նախկինում դատված գործընկերը

Ամանորի նախօրեին սպանություն է տեղի ունեցել Թբիլիսիի կենտրոնում․ 50-ամյա գործարարին սպանված են գտել դեկտեմբերի 31-ի երեկոյան, սեփական մեքենայում, «Մզիուրի» այգուց ոչ հեռու, տեղեկացրել է «Новости-Грузия»-ն։

Մի քանի ժամ անց որպես մեղադրյալ ձերբակալել են 57-ամյա Մալխազ Բագատուրիային։ Նա իր մեքենայով ընթանում էր Աբաշի ուղղությամբ, Վրաստանի մայրաքաղաքից մոտ 250 կիլոմետր հեռու։

Խուզարկության ժամանակ կասկածյալի մոտ գտել են չգրանցված հրազեն եւ մետադոնի  25 հաբ։

TV Pirveli-ն տեղեկացրել է, որ Բագատուրիան եղել է սպանվածի ընկերն ու բիզնես-գործընկերը, տղամարդիկ միասին զբաղվել են ավտոպահեստամասերի առեւտրով։

Կատարվածի հիմնական վարկածը վեճն է փողի պատճառով։ Ենթադրվում է, որ Բագատուրիան կրակել է ծանոթի վրա՝ նրան «պարզաբանման» կանչելով։

Լրագրողները նաեւ հնարավոր են համարում, որ սպանությունը կարող է կապված լինել թմրանյութերի հետ։ Ձերբակալվածը նախկինում դատված է եղել Թուրքիայում թմրահանցագործության համար։

Բագատուրիային մեղադրանքներ են ներկայացվել Վրաստանի ՔՕ երեք հոդվածներով՝ անօրինական զենքի, թմրանյութերի պահման եւ միտումնավոր սպանության համար։ Նրան սպառնում է 15 տարվա բանտարկություն։

Բագատուրիան ինքը ժխտում է, որ սպանել է գործընկերոջը։

Այսօր դատարանը կընտրի մեղադրյալի խափանման միջոցը։ Դատախազությունը պահանջում է  նրան թողնել կալանքի մեջ՝ մինչեւ քննության ավարտը։