Ռոնալդուին հեռացնելուց հետո ինձ 2 տարով զրկեցին «Ռեալի» խաղերից. Լա Լիգայի նախկին մրցավար

Լա Լիգայի նախկին մրցավար Խավիեր Էստրադա Ֆերնանդեսը հայտարարել է, որ Մադրիդի «Ռեալի» նախկին հարձակվող Կրիշտիանու Ռոնալդուին կարմիր քարտ ցույց տալուց հետո երկու տարով հեռացվել է «Արքայական ակումբի» մասնակցությամբ հանդիպումները սպասարկելուց։

Խոսքը, ամենայն հավանականությամբ, 2009/10 մրցաշրջանի Լա Լիգայի 13-րդ տուրի «Ռեալ» - «Ալմերիա» (4:2) հանդիպման մասին է, որի 88-րդ րոպեին Ֆերնանդեսը խաղադաշտից հեռացրել էր պորտուգալացուն։

«2009 թվականին Կրիշտիանուին հեռացնելուց հետո ես գրեթե երկու տարի չեմ սպասարկել «Ռեալի» խաղերը։ Այդ խաղից հետո, երբ տուն վերադարձա, ինձ զանգահարեց մրցավարական կոմիտեի ղեկավար Սանչես Արմինիոն։ Նա ասաց, որ իրեն դուր չի եկել տեղի ունեցածը, և որ այդ դրվագը հայտնվելու է ազգային բոլոր մարզական թերթերի առաջին էջերին՝ ակնարկելով, որ դա հետևանքներ կունենա»,- պատմել է նախկին մրցավարը։

Ֆերնանդեսը նաև հավելել է. «Ֆուտբոլն ունի մութ կողմ, որի մասին շատերը չգիտեն կամ չեն ուզում իմանալ, և կան մարդիկ, ովքեր օգտագործում են դա իրենց նպատակների համար»։