«Երաժշտություն հանուն ապագայի» հիմնադրամի «Մեր վիրտուոզները» ծրագրի դաշնակահարները մեկ բեմում էին իտալացի դաշնակահար Անտոնիո դի Կրիստոֆանոյի հետ

2013 թվականին հիմնադրված Խաչատրյանի անվան միջազգային փառատոնն ամեն տարի մայրաքաղաք Երևանում հյուրընկալում է համաշխարհային մեծության սիրված արտիստների։ Այս տարի՝ դեկտեմբերի 18-ին, Խաչատրյանի անվան 13-րդ միջազգային փառատոնի շրջանակում, Արամ Խաչատրյանի տուն-թանգարանում տեղի ունեցավ իտալացի դաշնակահար Անտոնիո դի Կրիստոֆանոյի մենահամերգը, որի ժամանակ իրենց կատարումներով ներկայացան նաև «Երաժշտություն հանուն ապագայի» հիմնադրամի «Մեր վիրտուոզները» ծրագրի կրթաթոշակառու դաշնակահարները։ Համերգի ընթացքում հնչեցին Շոպենի, Շումանի, Բրամսի, Լիստի և Բերգի դաշնամուրային ստեղծագործությունները։

Միջազգային ճանաչում ունեցող դաշնակահարի կողքին նույն բեմում հանդես գալը մասնագիտական փորձառություն էր հիմնադրամի պատանի երաժիշտների համար։

Սա դաշնակահարի և պատանի երաժիշտների միակ «համագործակցությունը» չէր։ Համերգին նախորդող ժամանակաշրջանում՝ երեք օր շարունակ, Անտոնիո դի Կրիստոֆանոն վարպետության դասեր անցկացրեց հիմնադրամի դաշնակահարների համար՝ փոխանցելով նրանց գործնական խորհուրդներ և կատարողական փորձ։

«Երաժշտություն հանուն ապագայի» հիմնադրամի «Մեր վիրտուոզները» ծրագիրը մշտապես կարևորություն է տալիս կրթաթոշակառուների համար վարպետության դասերի անցկացմանը միջազգային ճանաչում ունեցող երաժիշտների հետ։ Փորձի և հմտությունների փոխանակումը կարևոր է հիմնադրամի կրթաթոշակառուների համար՝ առաջընթաց գրանցելու և մասնագիտական աճի տեսանկյունից։ Այս համերգն ու վարպետության դասերը փորձառություն ձեռք բերելու և միջազգային բեմերը նվաճելու հերթական քայլերից մեկն էին։