Ադրբեջանից Հայաստան բենզինը սկսեց «հոսել»

Ադրբեջանից Հայաստան Վրաստանի տարածքով նավթամթերքի արտահանումը կսկսվի այսօր։ Ադրբեջանական լրատվամիջոցների փոխանցմամբ, SOCAR-ի կողմից արտադրված AI-95 բենզինի 22 երկաթուղային վագոն այսօր կուղղվի դեպի Հայաստան՝ համաձայն նոյեմբերի 28-ին Գաբալայում Ադրբեջանի փոխվարչապետ Շահին Մուստաֆաևի և Հայաստանի փոխվարչապետ Մհեր Գրիգորյանի միջև հանդիպման ժամանակ ձեռք բերված պայմանավորվածության։ Նշվում է, որ ադրբեջանական նավթամթերքի արտահանումը Հայաստան ունի զուտ առևտրային բնույթ, և բենզինը կվաճառվի միջազգային շուկայական գներով։

Դեկտեմբերի 8-ին Վրաստանի էկոնոմիկայի և կայուն զարգացման նախարարությունը հայտարարություն էր տարածել, որում նշվում էր, որ դեկտեմբերի 5-ին Թբիլիսին իր գործընկերներից դիմում է ստացել Վրաստանի տարածքով Ադրբեջանից Հայաստան վառելիքի միանվագ տարանցման վերաբերյալ. «Վրաստանի վարչապետ Իրակլի Կոբախիձեի որոշմամբ՝ «Վրացական երկաթուղիներին» հանձնարարվել է անհապաղ իրականացնել երկաթուղով միանվագ, լիովին անվճար բեռնափոխադրում»։ Մեկանգամյա ակցիան ընդամենը գովազդ և քաղաքական PR , հետագայի համար Թբիլիսն պահանջում է 92 դոլար՝ մեկ տոննայի համար։

Եվ դա է պատճառը, որ ադրբեջանական մեդիան այս օրերին կոշտ քննադատում է վրացիներին։ Մեր տեղեկություններով, Վրաստանից կախվածությունը նվազեցնելու համար Հայաստանն ու Ադրբեջանը քննարկում են Ղազախ–Իջևան մայրուղին վերագործարկելու, հետագայում էլ երկաթուղու հարց լուծելու հնարավորությունը՝ այդկերպ հաղթահարելու Վրաստանի դիմադրությունը։ Հենց դա է պատճառը, որ Վրաստանը նեղսրտել է, ապաշրջափակումից հետո նրա ազդեցությունը Հայաստանի վրա նվազելու է, փոխարենը կաճի Ադրբեջանի՝ ավելի վտանգավոր ազդեցությունը։

Լուսինե Կիրակոսյան