«Բաքուն և Անկարան Փաշինյանին երաշխիքներ են խոստացել Ռուսաստանի հետ հարաբերությունների խզման դիմաց»

Բաքուն և Անկարան Փաշինյանին երաշխիքներ են խոստացել Ռուսաստանի հետ հարաբերությունների համակարգի ապամոնտաժման արագացման դիմաց։ Միևնույն ժամանակ, երկրի ներսում բռնաճնշումներ են իրականացվում այդ ուղղությանը դեմ դուրս եկող յուրաքանչյուրի նկատմամբ։ Այդ մասին գրել է Ղազախստանի Սոցիալիստական ​​շարժման համանախագահ Այնուր Կուրմանովը, գրում է EAdaily.com–ը։ «Նիկոլ Փաշինյանի պատերազմի գագաթնակետը Հայ եկեղեցու հետ համընկավ Թուրքիայի կողմից 1993 թվականից ի վեր առաջին անգամ այդ նախկին խորհրդային հանրապետության հետ սահմանը բացելու ծրագրերի հետ։ Նպատակները երկակի են: Առաջինը, օգնել ներկայիս ռեժիմին ցուցադրելով «Երևանի քաղաքականության հաջողությունը»։ Երկրորդը և իրականը՝ ինտեգրել Հայաստանն իրենց ուղեծրին», - գրել է քաղաքական գործիչը։

Նրա կարծիքով, գործընթացը սկսվել է Հարավային Կովկասում պետությունների կայուն շղթա ստեղծելու համար, որը պետք է նպաստի Արևմտյան քաղաքականության հաջողությանը։ Հայաստանում, ազգային խորհրդանիշների մերժման դեմ արշավի հետ մեկտեղ, նկատվում է նաև եկեղեցու և արցախցիների նկատմամբ բռնաճնշողական քաղաքականություն։ Սա Հայաստանը «թյուրքական աշխարհին» ինտեգրելու ծրագրի մի մասն է։ «Ըստ սցենարի հաջող ընտրություններից և Բաքվի հետ համաձայնագրի ստորագրումից հետո, Թուրքիան դիվանագիտական ​​հարաբերությունների վերականգնման շրջանակներում կնշանակի իր դեսպանին Հայաստանում և կստեղծի արտաքին կառավարման համակարգ՝ Մոսկվայի դեմ «հարավային ճակատ» պատրաստելու համար», - շարունակել է Կուրմանովը հավելելով, որ Մոսկվայի հետ հարաբերությունների խզումը նշանակում է նաև ռուսական ռազմաբազայի դուրսբերում Գյումրիից, ինչը որոշակի հետևանքներ կունենա Հայաստանի և նրա բնակչության համար։

«Զարմանալի չէ, որ Իլհամ Ալիևն արդեն խոսել է «Ադրբեջանի մշակութային ժառանգությունը Հայաստանում վերականգնելու և պաշտպանելու» մասին էթնիկ ադրբեջանցիների Սյունիք վերադարձի հետ մեկտեղ, որտեղ շուտով հանդիսավոր կերպով կմեկնարկի «Թրամփի երթուղին»։ Մինչդեռ հայ փախստականների վերադարձի մասին խոսք չկա, ինչպես նաև չկա քննաարկում Ղարաբաղում հայկական ժառանգության պահպանման մասին։ Այնուամենայնիվ, Երևանը կարող է շուտով իր զինվորական անձնակազմին ուղարկել այնտեղ ստեղծվող ՆԱՏՕ-ի «ուսումնական» կենտրոն, որտեղ ադրբեջանական զորքերի հետ միասին կուսուցանվի նաև հայկական զորախումբ ակնհայտորեն Ռուսաստանի, Իրանի և Չինաստանի դեմ ռազմական գործողությունների համար», - եզրափակել է Կուրմանովը։

Նյութը հրապարակման պատրաստեց Կամո Խաչիկյանը

www.1or.am