Խիստ վտանգավոր մեսիջներ Արևմուտքից. «Փաստ»

«Փաստ» օրաթերթը գրում է.

Երբ ոչ մեկ անգամ փորձագետները նշում էին, թե առաջիկա ընտրություններում Արևմուտքը (ԵՄ-ն) և Փաշինյանը ուզում են Հայաստանը տանել, այսպես կոչված, «Մոլդովայի օրինակով», թվում էր, թե մի փոքր չափազանցնում են: Պարզվում է՝ ոչ:

Ավելին, դրա մասին արդեն բացահայտ է հայտարարվում, օրինակ՝ ԵՄ արտաքին գործերի և անվտանգության քաղաքականության գերագույն ներկայացուցիչ Կայա Կալասի կողմից: Մասնավորապես, Փաշինյանի կառավարությանը 15 միլիոն եվրո հատկացնելու մասին հայտնելով՝ նա օրերս շեշտել է, որ Հայաստանը լուրջ հիբրիդային մարտահրավերների առջև է կանգնած, «Ռուսաստանը արդեն իսկ սրում է ապատեղեկատվական արշավները Հայաստանի 2026 թվականի խորհրդարանական ընտրություններին ընդառաջ»: Բառացի Կալասն ասաց. «Մենք տեսնում ենք նույն ցանցերը, որոնք տեղակայվել էին Մոլդովայում, և որոնք ակտիվ են եղել այնտեղ, ուստի «գործնական ծրագիրը» նույնական է: Մեր ֆինանսավորումը կներառի նաև արտաքին միջամտության հայտնաբերումը, վերլուծությունը և արձագանքը»:

Ի՞նչ է սա, եթե ոչ ամենաուղիղ միջամտություն Հայաստանի ներքին գործերին: Դե, Ռուսաստանի անվան հիշատակումը, հասկանում եք, շղարշ է, հատուկ է արվում. փաստացի, Արևմուտքն արդեն լրիվ «բաց» է խաղում՝ հասկացնելով, որ ամեն գնով, ցանկացած բռնաճնշումներով թույլ չի տալու, որ հայ ժողովուրդն ազատվի փաշինյանական բռնատիրական ռեժիմից: Արևմուտքը բաց հայտարարում է, որ Մոլդովայի օրինակով պատրաստ են ծայրահեղ միջոցների, այն է՝ լռեցնել մարդկանց, փակել կուսակցություններ, թույլ չտալ քաղաքական ուժերի գրանցումներ՝ ընտրություններին մասնակցելու համար:

Պատրաստ են փակել լրատվամիջոցներ, կալանավորել ու բանտարկել հազարավորների: Ու, ահա, այդ բոլոր հակաժողովրդավարական միջոցների համար ՔՊ-ի իշխանությանը 15 միլիոն եվրո են տալիս: Մի խոսքով՝ «Ժողովրդավարությանն աջակցելու» անվան տակ՝ հակաժողովրդավարությանն աջակցելու համար:

Ի դեպ, թեման շարունակել է նաև Եվրոպական հանձնակատար Մարթա Կոսը՝ նշելով, թե մի 5 միլիոն եվրո էլ իրենք են հատկացնելու: «Տարածաշրջանային համագործակցության ակտիվացմանը և քաղաքացիական հասարակությանն աջակցելու, այդ թվում՝ Հայաստանում կայանալիք ընտրությունների նախապատրաստման շրջանում, ինչպես նաև ապատեղեկատվության բացահայտման, վերահսկման և դրա դեմ պայքարի համար»: Հասկանալի է, չէ՞, մեսիջը: Չնայած՝ սա ոչ թե մեսիջ, այլ նախազգուշական «զանգ» է:

Պատրանքներ չարժե ունենալ. Կալասին, Կոսին ու մյուսներին ո՛չ Նիկոլ Փաշինյանն է հետաքրքրում, ո՛չ էլ Հայաստանը: Նրանք կոնկրետ շահեր են հետապնդում, պարզապես հիմա Փաշինյանն այդ շահերն առաջ է մղում Հայաստանի հաշվին:

Մանրամասները՝ «Փաստ» օրաթերթի այսօրվա համարում