Հայաստան. Nvidia չիպերի փոխանցումը հաստատվել է, արհեստական բանականության խոշոր նախագիծը առաջ է շարժվում
ՎԵՐԼՈՒԾՈՒԹՅՈՒՆՆԵՐ
Հայաստանը ստանալով չիպերի փոխանցման հաստատումը սկսում է Nvidia-ի կողմից աջակցվող արհեստական բանականության կենտրոն ստեղծելու հավակնոտ նախագիծը: 500 միլիոն դոլարի նախաձեռնությունը խոստանում է ամրապնդել երկրի տնտեսությունը և տեխնոլոգիական դիրքը, գրում է appercase.ru–ն:
500 միլիոն դոլարի նախաձեռնությունը ԱՄՆ կարգավորող մարմինների կողմից հաստատվել է, և առաջադեմ Nvidia չիպեր են փոխանցվելու: Նախագիծն իրականացնում է Firebird-ը՝ հունիսին հիմնադրված ստարտափը, որը համագործակցում է Հայաստանի կառավարության հետ, և որի գրասենյակները գտնվում են Սան Ֆրանցիսկոյում և Երևանում:
Նոյեմբերի 20-ին տեղի ունեցած մամուլի ասուլիսում վարչապետ Նիկոլ Փաշինյանը հայտարարել էր, որ անձամբ է դիմել ԱՄՆ նախագահին չիպերի փոխանցման հաստատման գործընթացը արագացնելու համար, և որը օգոստոսին Հայաստանի և Ադրբեջանի միջև ստորագրված խաղաղության համաձայնագրի մաս էր կազմում: Փաշինյանը շնորհակալություն է հայտնել Սպիտակ տան արագ արձագանքի համար, որը թույլ կտա նախագծին վստահորեն առաջ շարժվել:
Կենտրոնը հագեցած կլինի Nvidia Blackwell գրաֆիկական պրոցեսորներով, որոնք, ըստ ընկերության, սահմանում են գեներատիվ արհեստական բանականության նոր ուղղություն շնորհիվ իրենց բարձր կատարողականության և արդյունավետության: Dell-ը նույնպես մասնակցում է նախագծին տրամադրելով PowerEdge սերվերներ և ընդգծելով այդ ձեռնարկի կարևորությունը երկու երկրների համար։
Փաշինյանը նշել է նախագծի ռազմավարական նշանակությունը Հայաստանի տնտեսական զարգացման համար, որը կօգնի երկրին Կովկասյան տարածաշրջանում առաջատար դիրք գրավել տեղեկատվական տեխնոլոգիաների և արհեստական բանականության ոլորտում: Ազգային անվտանգության համատեքստում այդ նախագիծը կարող է օգնել Հայաստանին վերականգնել ռազմավարական հավասարակշռությունը Ադրբեջանի հետ, հատկապես նախորդ հակամարտություններում կրած անհաջողություններից հետո։
Firebird-ը նախատեսում է համատեղել ձեռնարկատիրական նախաձեռնությունը, գլոբալ ենթակառուցվածքները և գլոբալ համագործակցությունը նորարարության և աճի նոր հնարավորություններ ստեղծելու համար: Նախագծի առաջին փուլը նախատեսվում է սկսել 2026 թվականի կեսերին: Կենտրոնը կսպառի մոտավորապես 120,000 բնակչություն ունեցող քաղաքի էլեկտրաէներգիային համարժեք էլեկտրաէներգիա և կպահանջի զգալի սառեցման ռեսուրսներ: Այսպիսով, Հայաստանը վստահ քայլեր է ձեռնարկում ուժեղ տեխնոլոգիական բազայի զարգացման ուղղությամբ, որը կարող է զգալիորեն վերափոխել նրա տնտեսական լանդշաֆտը և բարձրացնել նրա մրցունակությունը միջազգային ասպարեզում:
