Կմշակվի շարժական աղբյուրներից մթնոլորտն աղտոտող նյութերի արտանետումների հաշվարկման միասնական ուղեցույց. «Փաստ»

«Փաստ» օրաթերթը գրում է.

Շրջակա միջավայրի նախարարությունը հանրային քննարկման է ներկայացրել «Շարժական աղբյուրներից մթնոլորտն աղտոտող (վնասակար) նյութերի արտանետումների հաշվարկման մեթոդական ուղեցույցը հաստատելու մասին» նախագիծը։ Հայաստանի Հանրապետության գործող օրենսդրությամբ դեռևս չկան օրենսդրորեն ամրագրված մեթոդական ուղեցույցներ, որոնցով հնարավոր կլինի հաշվարկել մթնոլորտային օդն աղտոտող նյութերի արտանետումներն ինչպես աղտոտման անշարժ, այնպես էլ շարժական աղբյուրներից։ Շարժական աղբյուրներից մթնոլորտն աղտոտող նյութերի համապարփակ գույքագրման անհնարինության դեպքում՝ գիտականորեն հիմնավորված և հստակ հաշվարկների վրա հիմնված մթնոլորտային օդի աղտոտվածության նվազեցմանն ուղղված նպատակային քաղաքականությունն ուղղակիորեն դառնում է անհնար։

Նախագծով առաջարկվող շարժական աղբյուրներից մթնոլորտն աղտոտող նյութերի արտանետումների հաշվարկման մեթոդական ուղեցույցը նպատակ ունի ապահովել շարժական աղբյուրներից արտանետումների հաշվարկման միասնական, միջազգային ստանդարտներին համապատասխան մոտեցում՝ ապահովելով տվյալների համադրելիությունը և հաշվարկների համահունչությունը ինչպես ճանապարհային տրանսպորտային միջոցներից, այնպես էլ ոչ ճանապարհային տրանսպորտային միջոցներից։

Հրամանի ընդունման արդյունքում շարժական աղբյուրներից մթնոլորտն աղտոտող նյութերի միասնական հաշվառման, գույքագրման համակարգի ստեղծման համար նախադրյալներ կհիմնվեն, կսահմանվի աղտոտման շարժական աղբյուրներից (ճանապարհային և ոչ ճանապարհային տրանսպորտ) մթնոլորտն աղտոտող նյութերի արտանետումների հաշվարկման միասնական մեթոդաբանություն, կապահովվի շարժական աղբյուրներից մթնոլորտն աղտոտող նյութերի արտանետումների տվյալների համադրելիությունը և ճշգրտությունը, կբարձրանա քաղաքական որոշումների ընդունման և գնահատման գիտական հիմքը, կկատարելագործվի մթնոլորտային օդի որակի վերաբերյալ միջազգային չափանիշներին համապատասխան պետական հաշվետվությունների պատրաստումը, Հայաստանում մթնոլորտն աղտոտող նյութերի արտանետումների հաշվարկման արդյունքները համադրելի կլինեն ԵՄ անդամ երկրների և տարածաշրջանային մյուս պետությունների տվյալների հետ՝ ապահովելով միջազգային հաշվետվությունների բարձր որակ և համահունչություն։

Մանրամասները՝ «Փաստ» օրաթերթի այսօրվա համարում