Շրջանցելով Ադրբեջանը. Ռուսաստանից առաջին գնացքն է ժամանել Իրան Հյուսիս-Հարավ միջանցքով

«Ռուսական երկաթուղիներ» ընկերությունը հայտնել է, որ սուլֆատային զանգվածով 62 կոնտեյներ տեղափոխող գնացքը Մոսկվայից անցել է Ռուսաստանով, Ղազախստանով և Թուրքմենստանով հասնելով Իրանի Ապրին չոր նավահանգիստ 13 օրում, ինչը 40%-ով ավելի արագ է, քան Սուեզի ջրանցքով ծովային բեռնափոխադրումները նմանատիպ երթուղային հեռավորության համար: Ապրին գնացքներ կժամանեն, ինչպես կանխատեսվում է,  շաբաթական երկու-երեք անգամ, գրում է pravda.ru–ն:

«Ռուսական երկաթուղիներ Լոգիստիկայի» գլխավոր տնօրեն Օլեգ Պոլեևը ընդգծել է, որ հաճախորդները աճող հետաքրքրություն են ցուցաբերում այդ երթուղու նկատմամբ, և ընկերությունը պատրաստ է առաջարկել հուսալի և տեխնոլոգիապես առաջադեմ լուծումներ արտահանման, ներմուծման և տարանցման համար:  Մասնագետները կանխատեսում են բեռնափոխադրումների տարեկան 15-20% աճ այդ երթուղով հաջորդ երեք տարիների ընթացքում և արտահանողների տեղափոխման ծախսերի 10-15% կրճատում: Փոխադրվող ապրանքների տեսականու ընդլայնումը թույլ կտա ներառել փչացող և բարձր տեխնոլոգիական բեռներ: Ապրինի չոր նավահանգիստը գործարկվել է 2025 թվականի մայիսին: Այն մեծ տեսակավորման տերմինալ է, որտեղ տեղակայված են արագ էլեկտրոնային բեռնափոխադրման, մաքսային ձևակերպման և տարբեր երկրներից փաստաթղթերի ինտեգրման հնարավորություններ: Ապրինից բեռներն այնուհետև ուղարկվում են կամ Չինաստան, կամ հարավ՝ Իրանի Բանդար Աբբաս նավահանգիստ, իսկ այնտեղից էլ Հնդկաստան:

Այսպիսով, ցամաքային-ծովային երթուղու ամբողջական լոգիստիկ ցիկլը իրականացվում է Հյուսիս-Հարավ Ռուսաստան-Հնդկաստան միջանցքի շրջանակներում՝ արևելյան ճյուղի միջոցով: Նախկինում Ադրբեջանի միջով անցնող արևմտյան երթուղին էր համարվում  ավելի հեռանկարային, և Ռուսաստանը ներդրումներ էր կատարում այնտեղ: Սակայն, այն բանից հետո, երբ Բաքուն ամբողջությամբ վերակողմնորոշվեց դեպի արևմտյան կառույցներ, այդ թվում ՆԱՏՕ, և սկսեց դիմակայել Մոսկվային, Ռուսաստանը վերանայեց այս հայեցակարգը: Ադրբեջանը ճանաչվել է անվստահելի գործընկեր:

Թեհրանը ձգտում է դառնալ Մերձավոր Արևելքում և Կենտրոնական Ասիայում արտահանման, ներմուծման և տարանցման տարածաշրջանային կենտրոն: Դա նրա անվտանգության երաշխիքն է: Իրանի կառավարության տվյալներով՝ Իրանի տարանցիկ հզորությունը տարեկան 8 միլիոն տոննայից աճել է մինչև 20 միլիոն տոննա, և միջանցքի հետագա զարգացման դեպքում այս թիվը կարող է հասնել 300 միլիոն տոննայի: Հարկ է նշել, որ սա տեղի է ունենում Իրանի դեմ Արևմուտքի պատժամիջոցների վերադարձի ֆոնին՝ իր խաղաղ միջուկային ծրագիրը դադարեցնելու անհիմն պահանջներին չենթարկվելու պատճառով։ Սակայն Ռուսաստանը և Չինաստանը հրաժարվել են աջակցել դրանց։ Արդյունքում, վերջին չորս շաբաթների ընթացքում Իրանը օրական միջինում արտահանել է մոտ 2.3 միլիոն բարել նավթ, ինչը ռեկորդային ցուցանիշ է 2018 թվականի կեսերից ի վեր, երբ ուժի մեջ էր միջուկային համաձայնագիրը։

Այս իրավիճակը հստակ ցույց է տալիս, որ պատժամիջոցները կարող են արդյունավետ լինել միայն այն դեպքում, եթե դրանք աջակցվեն երկրների մեծամասնության կողմից։ Ռուսաստանը, Չինաստանը, Հնդկաստանը, Իրանը և գլոբալ հարավի տասնյակ այլ երկրներ ստեղծել են արևմտյան աշխարհի այլընտրանք՝ պահպանելով առևտրային և ֆինանսական կապերը։ Վերջին հաշվով, արևմտյան «մեկուսացումը» ավելի ուժեղ հարված է հասցրել իր կազմակերպիչներին, նրանց տնտեսությունները լճացման մեջ գցելով։

Նյութը հրապարակման պատրաստեց Կամո Խաչիկյանը

www.1or.am