«Այս կերպարով ծաղրում եմ քմահաճ աղջիկների». Աննա Դովլաթյանը` նոր սիթքոմում նկարահանվելու մասին

LIFE.TERT.AM-ը գրում է.

Երգչուհի, դերասանուհի Աննա Դովլաթյանը սկսել է  նկարահանվել «Շանթ» հեռուստաընկերության Outdance սիթքոմում։ Այս մասին Tert.am Life–ին հայտնեց դերասանուհին և լուսանկարներ տրամադրեց նկարահանման հրապարակից։ Նա նշեց, որ առաջարկը ստացել է հեռուստաընկերությունից` ծանոթանալով կերպարին, ընդունել է։

«Առաջին անգամ եմ խաղում հումորային սիթքոմում։ Ինձ համար սա նորություն էր, քանի որ հիմնականում սերիալներում եմ դերեր մարմնավորել։ Սկզբում բարդ պատկերացում ունեի սիթքոմում նկարահանվելու մասին։ Մոտեցումս այլ էր, բայց ռեժիսորի հետ աշխատելուց հետո հասկացա, որ սխալ պատկերացում եմ ունեցել։ Նա ինձ ասում է, որ պետք չէ այդպես լուրջ մոտենալ դերին, այն պետք է լինի ավելի թեթև, որպեսզի հումորային ստացվի։ Մեր նպատակն է` ճիշտ մատուցել կերպարը, որպեսզի այն, անգամ, լուրջ իրավիճակներում ծիծաղ առաջացնի հեռուստադիտողի մոտ»,– ասաց Աննան։

Դերասանուհու կերպարի անունն Անիտա է։ Նա ազդեցիկ մարդու դուստր է` քմահաճ, ինքնավստահ, բայց բարի աղջիկ։ «Անիտայի թուլությունը մի տղա է, որի մոտ պարի դասերի է գնում։ Ամեն ինչ անում է ուշադրություն գրավելու համար։ Դերը հետաքրքիր է, բայց իրականում նման բնավորությամբ մարդկանց չեմ սիրում։ Հուսով եմ` հանդիսատեսը կերպարը չի ասոցացնի ինձ հետ։ Քանի որ շատ հաճախ հեռուստադիտողն ընկալում է քեզ այնպիսին, ինչպիսին կերպարդ է։ Շատ անգամ հաշվի չեն առնում, որ դա դեր է և քեզ նման չէ։ Ես քմահաճ չեմ։ Ինքս չեմ սիրում նմանատիպ մարդկանց, քանի որ մտածում եմ` միայն դատարկ մարդը կարող է նման կերպ պահել իրեն։ Կարելի է ասել, որ այս կերպարով ծաղրում եմ այդ տեսակի մարդկանց»,– նշեց Աննան։

ՇԱՐՈՒՆԱԿՈՒԹՅՈՒՆՆ՝ այստեղ.