«Երաժշտություն հանուն ապագայի» հիմնադրամի կրթաթոշակառուները ելույթ ունեցան «Արտիս Ֆուտուրա» հիմնադրամի հոբելյանական համերգին
ՄՇԱԿՈՒՅԹ
Հոկտեմբերի 27-ին Մոսկվայի Միջազգային երաժշտության տանը տեղի ունեցավ «Արտիս Ֆուտուրա» (Артис Футура) հիմնադրամի հոբելյանական համերգը։ Համերգին իր կատարումներով ներկայացան տաղանդավոր երիտասարդ երաժիշտներ։ «Ռուսական ֆիլհարմոնիա» սիմֆոնիկ նվագախմբի հետ՝ Միխայիլ Բուտի ղեկավարությամբ, հանդես եկան «Երաժշտություն հանուն ապագայի» հիմնադրամի կրթաթոշակառուները։
Դաշնակահար Մարիա Ներսիսյանը ներկայացրեց Վ. Ա. Մոցարտի Կոնցերտ թիվ 20-ի առաջին մասը, սաքսոֆոնահար Միքայել Հարությունյանը՝ Պ. Իտուրալդեի «Հունական սյուիտը», իսկ կլարնետահար Արսեն Բալայանը՝ Ջ. Գերշվինի և Մ. Մանկանի «Ամերիկացին Փարիզում» բալետից «Բլյուզը» (Վ. Վարդանյանի փոխադրությամբ)։
Յուրաքանչյուր նման համերգ ևս մեկ հարթակ է, որն օգնում է տաղանդավոր պատանիներին մասնագիտական կայացման ճանապարհին ձեռք բերել նոր հմտություններ, հանդես գալ մեծ բեմերում և միաժամանակ դառնում է կամուրջ՝ միավորելով տարբեր երկրներում ապրող հայ տաղանդավոր երիտասարդ երաժիշտներին։
«Արտիս Ֆուտուրա»-ն «Երաժշտություն հանուն ապագայի» հիմնադրամի մշակութային նախագծերի գործընկերն է։ Միասին նրանք ձևավորում են երիտասարդ երաժիշտների աճի և միջազգային համագործակցության նոր հնարավորություններ։
