Հայաստանի իշխանությունները ձգտում են վերացնել մրցակիցներին ընտրություններից առաջ ու հաճոյանալ ԵՄ-ին. «Փաստ»

«Փաստ» օրաթերթը գրում է.

ren.tv-ն «Փորձում են հաճոյանալ ԵՄ-ին. Հայաստանի իշխանությունները ձգտում են վերացնել մրցակիցներին ընտրություններից առաջ» վերնագրով հոդվածում գրում է, որ ՀՀ իշխանությունները լայնածավալ արշավ են սկսել իրենց քաղաքական մրցակիցների դեմ: Ռուսաստանի հետ կապեր պաշտպանող ընդդիմադիր գործիչները ցանկացած անզգույշ հայտարարության համար հետապնդվում են կեղծ մեղադրանքներով: Նույնիսկ Հայ առաքելական եկեղեցու անդամներն են ենթարկվում հետապնդումների:

ren.tv-ի թղթակից Անտոն Զոլոտնիցկին է գրել ճնշումների ալիքի և Բրյուսելին հաճոյանալու փորձերի մասին:

Պաշտոնական Երևանը անցել է հարձակման: Իշխող «Քաղաքացիական պայմանագիր» կուսակցությունը սկսել է ակտիվորեն նախապատրաստվել հաջորդ տարվա խորհրդարանական ընտրություններին: Քաղաքական ասպարեզը մաքրվում է անցանկալի անձանցից: Հիմնական թիրախները դիմադրության տեղական կենտրոններն են: Գարնանը Գյումրին՝ Հայաստանի երկրորդ խոշորագույն քաղաքը, ընտրեց ընդդիմադիր քաղաքապետ, և Վարդան Ղուկասյանի դեմ անմիջապես ծավալվեց հետապնդումների արշավ: Փորձված և արդյունավետ մեթոդ է ձերբակալությունն անհիմն մեղադրանքների հիման վրա: «Սկզբում կոռուպցիայի մեղադրանքներ առաջացան, ապա, երբ պարզ դարձավ, որ համոզիչ ապացույցներ չկան, նրանք հորինեցին երկրորդ մեղադրանքը, այս անգամ՝ դավաճանության հետ կապված», - ասել է Քաղաքական փորձագիտության միջազգային ինստիտուտի տնօրեն Եվգենի Մինչենկոն։

Մեղադրանքի անհեթեթությունը նույնիսկ չի էլ թաքցվում։ Ղուկասյանին մեղադրում են «ՀՀ ինքնիշխանությունից հրաժարվելու հրապարակային կոչ անելու» մեջ հետևյալ խոսքերի համար. «Ինչպես ամբողջ Եվրոպան է դաշինք կազմում, այնպես էլ Չինաստանն ու Ռուսաստանն են դաշինք կազմում։ Հայաստանը նույնպես կարող է դաշինք կազմել և պահպանել իր անկախությունը։ Ես չեմ ասում, որ մենք պետք է դառնանք Պյատիգորսկի կամ Ուլ յանովսկի մարզ։ Ես ասում եմ, որ ՀՀ-ն պետք է միություն կազմի Ռուսաստանի հետ»։

ՀՀ իշխանությունները հստակորեն որդեգրել են օրուել յան երկմտանքի քաղաքականությունը։ Ի վերջո, եթե արտաքին դաշինքների կոչերը սպառնում են ինքնիշխանությանը, ինչո՞ւ է հանրապետության արտաքին գործերի նախարարը դեռևս ազատության մեջ։ «2026 թվականին մենք պետք է ակտիվացնենք մեր ջանքերը ԵՄ անդամակցության հասնելու համար: Հայաստանը ձգտում է միանալ ժողովրդավարական, զարգացող և բարգավաճ երկրների ընտանիքին», ասել էր ՀՀ ԱԳ նախարար Արարատ Միրզոյանը։

Բայց «ծաղկող եվրոպական այգու» մասին շողշողուն կարգախոսների հետևում թաքնված է ուշադիր թաքցված իրականություն: ԵՄ-ին միանալով՝ երկրներն իրենց ինքնիշխանության զգալի մասը զիջում են Բրյուսելի բյուրոկրատիային, արտաքին քաղաքականությունը վերահսկվում է Եվրոպական հանձնաժողովի կողմից, իսկ այլախոհ կարծիքները ճնշվում են։ «Նրանք պահանջում են, որ նույնիսկ սկզբնական փուլում այն թեկնածուների նկատմամբ պատժամիջոցներ կիրառեն, որոնց Եվրամիությունը նշանակել է որպես իր թշնամիներ», - ընդգծել է Ռուսաստանի արտաքին գործերի նախարարության խոսնակ Մարիա Զախարովան։

Ըստ էության, հայ ժողովրդին պատրաստվում են սեփական ինքնությունից հրաժարվելուն: Հազարամյակների պատմությունն ու մշակույթը փոխարինվում են լիբերալ արժեքներով: Հետևաբար, բավականին տրամաբանական է այն, որ հետապնդումների մեկ այլ թիրախ է Հայ առաքելական եկեղեցին։ Հայաստանի իշխանությունները թիրախավորել են Հայ եկեղեցու բարձրագույն հոգևորականներին: Նրանք փորձում են կարգալույծ անել Ամենայն հայոց կաթողիկոս Գարեգին Բ-ին: Եկեղեցու քահանաներն ու պաշտպանները ձերբակալվում են: Գործարար Սամվել Կարապետյանը կալանքի տակ է հունիսից։ «Եկեղեցու վրա այս հարձակումը ոչ միայն անբարոյական է, այլ նաև լիովին հակասում է եվրոպական օրենսդրությանը: Հայաստանը ապագա չունի Եվրոպայում», - ասել է Կարապետյանի փաստաբան Ռոբերտ Ամստերդամը։

Սակայն նրանք գործում են Ուկրաինայում փորձարկված ճիշտ նույն եվրոպական սցենարի համաձայն. եկեղեցիները պաշարվում են ոստիկանության կողմից, իսկ Հովհաննավանքը գրավվել է հերձվածողների օգտին: Այլ կերպ ասած՝ նրանք հարվածում են հայ ազգի սրտին: «Հայ ժողովրդի համար Հայ առաքելական եկեղեցին անվիճելի հեղինակություն է եղել դարեր և հազարամյակներ շարունակ: Եվ, ըստ էության, այն հայ ժողովրդի ինքնության հիմքն է», - հավելել է քաղաքագետ և Ռուսաստանի քաղաքագիտության ասոցիացիայի խորհրդի անդամ Վլադիմիր Շապովալովը։ Ակնհայտ է, որ նպատակը հայ ժողովրդին զրկելն է այդ հիմքից:

Խորհրդարանական ընտրությունների նախաշեմին հալածանքների թափանիվը կարագանա: Հայաստանի իշխանությունները պատրաստ են ռիսկի դիմել՝ փորձարկելով հայ հասարակության ազատատենչ բնույթի ամրությունը:

Մանրամասները՝ «Փաստ» օրաթերթի այսօրվա համարում