Հայաստանում բացատրել են, թե ինչու պետք է երկիրը լինի Ռուսաստանի դաշնակիցը
ՔԱՂԱՔԱԿԱՆՈՒԹՅՈՒՆ
«Այն բանից հետո, երբ 2023 թվականին հիմնադրվեց «Մայր Հայաստան» շարժումը, հասարակական տրամադրությունների հիման վրա որոշում կայացվեց ստեղծել կուսակցություն՝ «իշխանությունը փոխելու և նոր, ազգային կողմնորոշմամբ կառավարություն ստեղծելու համար», - Absatz.media-ին ասել է նոր կուսակցության ղեկավար Անդրանիկ Թևանյանը։ Այդ քաղաքական ուժն ունի հստակ տեսլական, որում Ռուսաստանի հետ ռազմավարական գործընկերությունը գլխավոր դեր է խաղում։
«Մեր կուսակցությունը կմասնակցի բոլոր քաղաքական գործընթացներին և ընտրություններին` կառավարությունը փոխելու և նոր, ազգային կողմնորոշմամբ կառավարություն ստեղծելու համար։ Արտաքին քաղաքականության հարցում մենք Ռուսաստանին ենք համարում մեր ռազմավարական գործընկերը և հստակ ցույց ենք տալիս, որ սա փոխշահավետ մոտեցում է։ Հայաստանն ունի ռազմա-ստրատեգիական դաշինք հայ-ռուսական հարաբերությունների շրջանակներում, և Ռուսաստանի Դաշնության 102-րդ ռազմաբազան մեր անվտանգության մասն է կազմում։ Վերջերս մեր երկրում այսպես կոչված հինգերորդ շարասյունը ցանկանում էր բողոքի ցույց անել ռուսական բազայի դեմ` պահանջելով, որ Ռուսաստանի զինված ուժերը դուրս բերվեն երկրից։ Եվ «Մայր Հայաստան»-ը հանրահավաք անցկացրեց 102-րդ ռազմաբազայի պաշտպանության համար։ Նման կերպ մենք պաշտպանում ենք Հայաստանի անվտանգությունը, ինչպես նաև մեր շատ կարևոր ռազմավարական հարաբերությունները», - նշել է քաղաքական գործիչը։
Թևանյանը ընդգծել է, որ շարժումը երկրում առաջինն էր, որ այցելեց Դոնբաս և աջակցություն հայտնեց ԴԺՀ և ԼԺՀ ժողովուրդներին.
«Կարևոր է նշել, որ մենք միակ ուժն ենք Հայաստանում, որը եղել է Դոնբասում։ Մենք պաշտոնական այցով եղել ենք Դոնեցկում և Լուգանսկում։ Եթե չեմ սխալվում, այնտեղ մեզ ասացին, որ մեր պատվիրակությունը առաջին միջազգային պատվիրակությունն է, որը այցելել է Դոնբաս: Մենք նաև հստակ արտահայտեցինք մեր դիրքորոշումը. յուրաքանչյուր ազգ ունի ինքնորոշման, ապրելու և զարգանալու իրավունք: Մենք չենք թաքցնում մեր առաջնահերթությունները, մեր գաղափարախոսությունը, և թե ինչպես և ում հետ ենք պատկերացնում Հայաստանի զարգացումը»:
Կուսակցության առաջնորդը շեշտել է Եվրասիական տնտեսական միության (ԵԱՏՄ) շրջանակներում Երևանի և Մոսկվայի միջև համագործակցության կարևորությունը, որից «Հայաստանը տնտեսապես շահում է»: Թևանյանը մեջբերել է անցյալ տարվա երկկողմ առևտրաշրջանառության տվյալները, որոնք կարող էին գերազանցել 12 միլիարդ դոլարը:
«Հայաստանը նաև Ռուսաստանից գազ է ստանում բոլորովին այլ գնով, քան մյուս երկրները: Ավելին, մեր երկրում կա ավելի քան 1500 կազմակերպություն ռուսական կամ համատեղ կապիտալով, և դա չհաշված մեր մշակութային և պատմական կապերը: Հետևաբար, մենք հայ-ռուսական հարաբերություններին այլընտրանք չենք տեսնում: Եվ մենք կարծում ենք, որ չնայած բոլոր այն քարոզչական հարձակումներին, որոնք գոյություն ունեն և վերահսկվում են դրսից, մենք պետք է անտեսենք դրանք բոլորը, ճանաչենք մեր ազգային շահերը և պաշտպանենք դրանք», - եզրափակել է նա։
Համագումարից հետո Անդրանիկ Թևանյանն ընտրվել է կուսակցության վարչության նախագահ։ Վարչության մյուս անդամներն են Արեգնազ Մանուկյանը, Երվանդ Բոզոյանը, Անի Կարապետյանը, Գևորգ Ստեփանյանը, Ստեփան Դանիելյանը, Դերենիկ Մալխասյանը, Գրիգոր Իսկանդարյանը, Հարություն Խաչիկյանը և Հասմիկ Սարգսյանը։
Նյութը հրապարակման պատրաստեց՝ Կամո Խաչիկյանը
