Ինչպես ազատվել ավելորդ քաշից և պահպանել արդյունքը

Գրեթե բոլորն էլ կյանքում գոնե մեկ անգամ փորձել են նիհարել դիետաների միջոցով, սակայն քչերին է հաջողվել ոչ միայն նիհարել, այլև պահպանել արդյունքը: Բանն այն է, որ մինչ դիետաներին հետևելը մարդը պետք է հասկանա, որ արդյունավետ դիետան կարճաժամկետ չի լինում և լավ արդյունքի հասնելու համար հարկավոր է փոխել սննդակարգը ոչ թե մեկ շաբաթով, այլ մշտապես:

Կարճաժամկետ խիստ դիետաները ոչ միայն անարդյունավետ են, այլև շատ վնասակար, ուստի սննդակարգը հարկավոր է կտրուկ փոխել և միշտ սնվել այդ կերպ: Սա կարող է շատ բարդ թվալ, սակայն իրականում մեծ ջանքեր հարկավոր չեն: Պարզապես անհրաժեշտ է հետևել հետևյալ խորհուրդներին:

Պարբերականություն

Սնունդը հարկավոր է ամեն օր նույն ժամերին ընդունել, սակայն դրա քանակը կհուշի միայն սննդաբանը, քանի որ ոմանց օրգանիզմին հարմար է լինում երեքանգամյա սնունդը, իսկ ոմանց օրգանիզմին՝ հիգանգամյա: Սակայն հարկ է հիշել, որ ոչ մի դեպքում չի կարելի օրական երեք անգամից պակաս ուտել, քանի որ այդ կերպ մարդը ոչ միայն շատ է ուտում, այլև կարող է գաստրիտ ձեռք բերել: Բանն այն է, որ երկարատև «սննդային զսպվածության» դեպքում օրգանիզմն արտադրում է քաղցի հորմոններ: Ընդ որում՝ որքան երկար ժամանակ մարդը սնունդ չի ընդունում, այնքան շատ քաղցի հորմոն է արտադրվում:

Չափավորություն

Աղեստամոքսային համակարգը չծանրաբեռնելու և ավելորդ քաշից ազատվելու համար հարկավոր է նվազեցնել սննդի չափաբաժինները: Օրինակ՝ կարելի է սովորականից ավելի փոքր ափսեով ուտել: Բացի այդ, հարկ է հիշել, որ քաղցի զգացումն անհետանում է ուտելուց միայն 20 րոպե անց, ուստի անհրաժեշտ մի փոքր քաղցած ավարտել ճաշը:

Հավասարակշռություն

Սննդակարգը պետք է հարուստ լինի և՛ սպիտակուցներով(50%), և՛ ճարպերով (30-40%), և՛ ածխաջրերով (10-20%), և՛ վիտամիններով ու հանքանյութերով, քանի որ որևէ տարրի պակասի դեպքում օրգանիզմը չի կարողանում բնականոն աշխատել:

Սպիտակուցների հիանալի աղբյուր են պանրի անյուղ տեսակները, կաթնաշոռը, կաթնամթերքը, անյուղ միսը, սպիտակ թռչնամիսը, ձուկն ու ծովամթերքը:

Ճարպերի մեծ մասը պետք է լինի բուսական ծագման (բուսայուղեր): Օգտակար են նաև օմեգա-3 և օմեգա-6 ճարպաթթուները (ձկան յուղ), մինչդեռ կենդանական ծագման ճարպերը ցանկալի է բացառել:

Ածխաջրերից հարկավոր է բացառել «արագ» ածխաջրերը (հացաբուլկեղեն ու քաղցրավենիք) և երբեմն օգտագործել քիչ քանակությամբ մակարոնեղենի կոշտ տեսակներ, ամբողջական հացահատիկից պատրաստված հաց, չզտված հացահատիկ և այլն: Նաև շատ կարևոր են մրգերն ու կանաչեղենը, որոնք օգնում են մաքրել օրգանիզմը տոքսիններից և բարելավում են մարսողությունը:

Բացի այդ, հարկավոր է մոռանալ արագ սննդի, քաղցր գազավորված ըմպելիքների, պատրաստի հյութերի, հացաբուլկեղենի, քաղցրավենիքի, սոուսների և աղի մթերքի մասին:

Խորհուրդներ, որոնք կօգնեն ավելի հեշտ հագենալ քիչ քանակությամբ սնունդով

·        Հարկավոր է դանդաղ ուտել և լավ ծամել սնունդը: Այդ դեպքում օրգանիզմը հագենալու մասին ազդանշանը ժամանակին կհաղորդի:

·        Սնվելու համար հարկավոր է հատուկ ժամ հատկացնել և չուտել հեռուստացույց դիտելով կամ համակարգչի առջև:

·        Հաճախ մարդիկ ծարավի զգացումը շփոթում են քաղցի հետ, ուստի հարկավոր է օրվա ընթացքում մինչև 2 լիտր ջուր խմել: Կարելի է ամեն անգամ ուտելուց առաջ մի բաժակ սենյակային ջերմաստիճանի ջուր խմել, ինչը կօգնի ակտիվացնել նյութափոխանակությունն ու կնպաստի տոքսինների դուրսբերմանը:

·        Ախորժակը նվազեցնելու համար շատ արդյունավետ կարող են լինել արոմաթերապիաները: Կարելի է որևէ եթերայուղ (անանուխ, վարդ, թուրինջ, սամիթ կամ վանիլ) կաթեցնել թաշկինակին և պարբերաբար շնչել դրանց բույրը:

·        Երբեմն հարկավոր է քաղցրավենիք ուտել: Շաբաթական 2-3 անգամ մի կտոր դառը շոկոլադ կամ զեֆիր ուտելը չի վնասի կազմվածքին:

·        Ավելորդ քաշից ազատվելու գործընթացը շատ ավելի արագ և ուրախ է անցնում, եթե մարդը միայնակ չի լինում, ուստի կարելի է համախոհներ գտնել և շատ ավելի հաճելի դարձնել այդ գործընթացը:

·        Օրվա ընթացքում հարկավոր է տարբեր հետաքրքիր զբաղմունքներ գտնել, ինչը կօգնի շատ ավելի քիչ մտածել ուտելու մասին:

Բեռնաթափման օրեր

Սակայն պետք չէ կարծել, որ կարելի է նիհարել՝ շաբաթը մեկ օր քաղցած մնալով, իսկ մյուս օրերին ամեն ինչ ուտելով: Բեռնաթափման օրեր անցկաացնելն իմաստ ունի միայն սննդակարգն ամբողջությամբ փոփոխելու դեպքում:

Բացի այդ, բեռնաթափման օրերը հակացուցված են շաքարային դիաբետի ու աղեստամոքսային տրակտի հիվանդությունների դեպքում, ինչպես նաև ծանր հիվանդություններից հետո:

Մասնագետները խորհուրդ են տալիս բեռնաթափման օրեր անցկացնել շաբաթական առավելագույնը 1-2 անգամ: Այս օրերին կարելի է ուտել 1,5-2 կգ կանաչ խնձոր, 500 գրամ անյուղ կաթնաշոռ և 1 լիտր կեֆիր, 1,5 կգ թարմ վարունգ կամ 1,5 կգ շագեխաշած բանջարեղեն: Բացի այդ, բեռնաթափման օրեր անցկացնելիս հարկավոր է չմոռանալ հեղուկի մասին և հնարավորինս շատ մաքուր ջուր ու բուսական թեյեր խմել: